Mester aplica pa prolongacion

FASE manera cu Aruba a bin ta conoce ta yegando su final. Sin duda un ayudo financiero di Gobierno pa miles y miles di hende cu di un dia pa otro a bay na 0.

Un ayudo y sosten financiero cu Minister Glenbert Croes a anuncia, sin sa ta con lo logr’e pero cu a comproba cu unda tin boluntad y bon intencion, Dios ta habri e caminda. Esaki ta conduci na un ayudo cu a sustenta nos comunidad den temporada di crisis nunca antes visto ni biba tampoco, te cu awo.

E proceso no a bay sin su erornan, e no a bay sin su ‘glitch’nan. Pero e ta un proceso cu no tabata existi. E ta un proceso literalmente inventa di un anochi pa mainta, cu a crea y causa problemanan den caminda. Un tardansa enorme, flexibilisacion di rekisitonan, a suavisa e exigencianan pa por acomoda mas hopi ciudadano cu ta posibel. Pues di nada, como unico pais na mundo, Aruba a conoce e sosten financiero FASE.

Esaki awo ta yegando su final. Ultimo dia di pago ta fin di September.

Kico lo bin despues, Minister Glenbert  Croes y su team ta trahando riba dje. E siguiente etapa tin tur prioridad, un solucion duradero y sostenibel, cu apoyo legislativo necesario, pues un solucion structural permanente.

Manera e mandatario a expresa, “E tin tur confiansa cu e proximo etapa tambe lo sa di ofrece e alivio y sustento necesario na tur hende cu tin 0 entrada”.

E recordatorio di Minister Glenbert Croes: “No ta pasobra bo ta hayando FASE awe kiermen cu e prolongacion ta bay automaticamente. NO! Mester registra di nobo prome cu 15 di augustus. Pa esunnan cu awo a perde trabou, e ultimo dia pa aplica pa prome biaha pa FASE tambe ta 15 di augustus y lo bo ricibi FASE solamente pa luna di augustus y september”.

9 augustus 2020