Despues di e aumento di casonan di Corona virus na Aruba den poco dia, Gobierno di Aruba a tuma algun medida pa purba domina e aumento di cantidad di casonan den nos comunidad. Cu e medidanan cu a wordo tuma Gobierno y Crisis Team kier evita di mester tuma medidanan mas drastico manera toque de queda, shelter in place of lock down. Gobierno a scoge aworaki pa no kibra nos economia pero pa cera fuentenan caminda e virus ta brota of tin riesgo halto pa brota.

“Nos no kier afecta nos economia manera el a afecta nos e prome biaha”, Prome Minister a expresa.

Pa loke ta trata bar, clubnan nocturno y rumshop ta cera henter dia te cu proximo aviso. Pa loke ta fiestanan priva na cas cu musica na unda ta bende ticket pa hendenan bin y aglomera, tampoco ta wordo permiti, incluyendo fiestanan di famia. 

E uzo di mondmasker ta bira obligatorio den transporte publico, bus, taxi y autobusnan. Cualkier persona cu ta haci uzo di transporte publico mester bisti e mond masker. Tambe si bo ta bay den cualkier luga publico na unda ta duna un servicio bo mester tin un mondmasker bisti. Cualkier calidad di mondmasker aworaki ta yuda. Esnan cu ta traha den oficina, e doño di trabou ta dicidi kico ta e protocol pasobra esnan den oficina ta wordo considera un tipo di kluster. Si nos bay na scenario 3 cual ta un plamamento mas grandi e ora nos ta cuminsa pone exigencia na e tipo di mondmasker nan. 

Pa loke ta trata entiero, e protocol ta valido cu un maximo di 25 persona na funeraria, na misa y na santana. Gobierno no kier cera misa y iglesianan ainda pero mester cooperacion di tur hende pa cumpli cu e protocolnan. Lamentablemente nos mester a stop tur cantamento den misa pasobra e riesgo cu e dropletsnan por sali y bay mas leu y comparti cu otro ta grandi y asina comberti den un otro fuente di contagio. A tuma nota cu na hopi paisnan ta hopi a wordo infecta door di e cantamento den servicionan religioso.

Samenscholingsverbod tambe ta na vigor. No ta permiti pa tin gruponan di hende riba caya of den luganan publico. Esaki ta conta pa lama, beach y tur otro caminda. E grupo no mag ta mas di 4 persona y si Polis haña un grupo di mas hende lo hala nan di otro a base di ley. Excepcion ta pa famianan cu ta mas di 4 persona den un cas.

Tambe mester a tuma e decision di protehe nos grandinan den casnan di cuido. Nos ta stop bishita y ta pidi tur ciudadano porfabor pa cuida nos grandinan cu ta na cas of den otro circumstancia pasobra nan ta esnan mas vulnerabel y ta biba hunto den un espacio relativamente chikito. Si un bira malo e riesgo pe ta grandi tambe. 

Pa deporte tambe a tuma decision pa para nan aworaki. Dus tur deporte di contacto y/of deporte di paden. Lo bay evalua e proposicion cu a haña di IBISA pa despues wak cua excepcion lo por wordo haci. Pa awor ta para nan y pa fin di siman ta wak pa yega na un acuerdo cu IBISA.