Dialuna anochi, den conferencia di prensa extraordinario di Gobierno di Aruba hunto cu Crisis Team y Minister di Salubridad, Prome Minister Evelyn Wever-Croes a anuncia cu Aruba a conoce 5 caso di transmision local di Covid-19. Esakinan ta personanan cu a contrae e virus aki na Aruba y no tin un historia di biahe. Debi na e casonan di contagio aki, Gobierno di Aruba a tuma varios desicion pa implementa medidanan adicional pa contene e virus cuminsando ya entrante 4 di augustus.
Un medida cu a ser tuma ta entre otro pa establecimentonan manera bar y restuarant y otronan cu ta ofrece publico entretenimento musical. Cu e medida implementa, no por tin presentacionnan musical na e establecimentonan aki. Esaki den e contexto cu e presentacionnan aki ta atrae aglomeracionnan di hende. Por a nota cu den e ultimo simannan, hendenan cu ta asisti na e luganan aki, no ta atene na e regla di distanciamento di 1.5 meter.
“Gobierno, consecuentemente, a haye forsa pa tuma e medida aki inmediatamente. Sinembargo, hunto cu e desicion aki, Gobierno di Aruba a dicidi tambe pa bay den deliberacion cu musiconan pa yega na solucion con por sali di esaki y cua actividadnan si por permiti y bou cua condicionnan”, Prome Minister a duna di conoce.
Na e momentonan aki, Gobierno ta buscando contacto cu musiconan pa asina por bay den deliberacion inmediato.
