Cu nos determinacion y nos vision, nos lo haci Aruba fuerte atrobe,
Dia 6 di juli, Gobierno di Aruba a wordo sorpendi pa cantidad di condicionnan nobo cu Hulanda kier a pone na e placa pa di 3 tranche. Prome Minister Evelyn Wever-Croes desde e dia ey a indica cu Gobierno di Aruba no por a acepta esakinan sin mas. Pa cua motibo tambe, e Prome Minister di nos pais, dia 10 di juli, a bay Hulanda pa atende e asunto aki su mes den Rijksministerraad pa purba haya mas tempo y pa bay na mesa cu otro pa negocia. Esaki Prome Minister a logra tambe y Hulanda a cuminsa un trayecto separa cu Aruba.
Prome Minister a duna di conoce, dunando un update dialuna mainta den conferencia di prensa di Gobierno di Aruba tocante e negosacionnan cu Hulanda, cu na Aruba el a cuminsa un proceso transparente y habri di consulta cu gremionan sindical y empresarial, lidernan politico y Parlamento. Tawata tin varios reunion y a base di e input cu a ricibi durante e reunionnan aki, Prome Minister a cuminsa negocia cu Hulanda.
Gobierno di Aruba a tene cuenta cu e puntonan cu a wordo treci padilanti:
1. Autonomia: Aruba no mag di perde su autonomia den e proceso aki. Prome Minister a enfatisa cu Gobierno ta realisa cu Aruba mester di ayudo di Hulanda y Gobierno ta realisa tambe cu ta nos autonomia a trece nos te na unda nos ta, cu un di e desaroyo turistico mas exitoso na mundo. Entre e dosnan aki, Prome Minister ta negociando cu Hulanda, pa respeta nos estado di derecho, respeta cu Aruba mester por scoge su gobiernonan y pa respeta e rol di Parlamento di Aruba.
2. E landspakketnan cu ta wordo impone mester wordo poni den contexto di Aruba. Por ehempel dolarisacion, edad di pensioen di 66 aña entrante 2023 y 67 aña entrante 2025, y e hecho cu e entidad hulandes por dicidi di bende e accionnan den companianan estatal.
3. Supervision financiero: Gobierno ta compronde cu Hulanda lo kier mas grip y mas supervision, pero Gobierno kier pa acopla mas supervision na mas beneficio financiero pa pais Aruba, por ehempel den refinanciamento di nos debe.
“Negosacionnan ta bayendo den un ambiente di respet y dialogo. Nos no ta cla ainda”.
Otro siman diabierna 14 di augustus tin un Rijksministerraad y diaranson awor 5 di augustus Gobierno lo tene un encuentro pa duna un update na gremionan di Aruba.
Pa e luna di juli y parti di augustus Gobierno a logra cumpli cu tur debernan. Loonsubsidie: 18.666 trahado, total 30 miyon. 1606 compania a haya e asistencia na empresa mediano y chikito di Afl. 4000, total 6.4 miyon. 4185 persona a cobra fase, total 3.8 miyon. Apesar di no a haya e placa di Hulanda ainda, nos a cumpli. Con? Nos a corta mas gasto di gobernacion pa por paga esaki, y nos a postpone algun pago.
“Pero awor si ta birando mas necesario pa haya e ayudo di Hulanda. Nos ta awor den un problema serio. Sin ayudo nos lo no sali di esaki. Nos mester di ayudo. E unico cu ta ofrece pa yuda nos ta Hulanda. Nan ta pone condicionnan draconico. Nos ta purbando pa suavisa e condicionnan pa nos por yega na e fondo.
E no ta facil, pero e ta necesario awor. Cu nos determinacion y nos vision, nos lo haci Aruba fuerte atrobe, cu un economia mas fuerte y un autonomia mas fuerte”, Prome Minister a duna di conoce.
