Den un carta dirigi na Presidente di Parlamento sr. Ady Thijsen diadomingo, Prome Minister Evelyn Wever-Croes a informa sr. Thijsen cu e esfuersonan pa intermediacion den e asunto interno di POR no por a tuma luga ainda pasobra Minister Marisol Lopez-Tromp a biaha.
Den e carta Prome Minister ta informa Presidente di Parlamento cu su intentonan anterior no tabata exitoso pasobra ambos partido tabata determina cu ta den Parlamento mester atende cu e topico aki.
“En bista di e seriedad di e asunto, y e peticion haci na mi persona pa intermedia, mi a tuma contact cu Minister Marisol Lopez-Tromp mesora diasabra merdia, pa confirma si e ta dispuesto pa participa na un intermediacion di mi parti, cual el’a confirma. Mi intencion tabata di haci e intermediacion aki inmediatamente pa asina e reunion por continua dialuna caba, den di dos tanda, mirando cu henter Aruba ta en espera di esaki.
Mientras mi tabata en espera pa haya sa ki ora nos por reuni, mi a tuma nota via medionan social y prensa cu Minister Marisol Lopez-Tromp tabata biahando pa Hulanda. El’a confirma esey despues y a bisa cu e ta comunicable toch mientras cu e ta na Hulanda.
Sinembargo, mirando e seriedad di e tema, mi ta di opinion cu mester haci e esfuersonan di intermediacion en persona y mi a urgi Minister Lopez-Tromp pa mesora cu e yega Aruba bek, pa e comunica cu mi, pa nos pone prioridad na e proposicion di POR”, Prome Minister a duna di conoce.
Ta conoci cu Prome Minister ta recuperando di un operacion haci siman pasa y ta di aprecia cu asina mes el’a tuma inicitativa mesora pa atende cu e topico aki, mirando cu gran parti di nos comunidad tabata en espera di continuacion di e reunion. Ta lamentable cu e reunion no por continua e siman aki.
