Oficina di Propiedad Intelectual situa na Adriaan Lacle Boulevard 3, como departamento di Gobierno ta duna servicio na publico pa registracion di Marca, registracion di Derechonan di Autor y Patent entre otro.
Debi na e situacion di e pandemia di Covid 19, servicionan di nos oficina mescos cu tur otro luga, a rekeri pa haci algun cambio y ahustacion pa cumpli cu e protocol y normanan nobo cu DVG y Gobierno ta pidi departamentonan gubernamental pa cumpli cune.
En conexion cu esaki, Oficina di Propiedad Intelectual a tuma e precaucionnan necesario y ta informa na publico e cambio den e forma di pago pa nos servicionan.
Anteriormente por a paga ainda cu placa cash, pero recientemente a instala un POS-Machine cu ta facilita tramitenan di pago y awor por simplemente swipe y paga.
Entrante dialuna, 20 di juli 2020 lo no acepta placa cash mas na nos oficina. Pagonan solamente por wordo efectua atrabes di e POS swipe machine of transferencia via banco riba e cuenta di BIE na Aruba Bank.
Director y personal di Oficina di Propiedad Intelectual ta gradici pa e comprension y ta encurasha comunidad pa sigui e reglanan di higiena stipula pa DVG y Gobierno di Aruba, pa hunto nos combati e coronavirus. Pa informacion of cualkier pregunta por tuma contacto cu Oficina di Propiedad Intelectual na telefon 583 12 00.
