ORANJESTAD – Respet y dignidad ta derechonan humano basico. Ningun acto sin respet y cu ta pone dignidad di hende y un Pueblo na peliger, por wordo yama of considera un chens di oro.

Pa pone Aruba den un posicion na unda cu mayoria di e Pueblo den pleno crisis mester bay sinti e miedo di por bay keda sin placa pa por bay cubri su necesidad basico, no ta un acto noble y tampoco etico. Por busca hopi fayo pa purba hustifica condicion, ma ningun por tapa e hecho cu e actuacion ta contra e derecho basico di un Pueblo y Pais pa wordo trata cu respet y dignidad.

Hopi kizas no ta realisa kico autonomia ta. Pa falta di conocemento hopi ta kere cu e ta djies un palabra bieuw, di un lucha bieuw, un orguyo infunda of palabra cu politiconan ta djies malusa. Ma en realidad, autonomia ta relata na bo dignidad como hende. Hasta ora bo ta convaliciente, e ta di suma importancia pa bo wordo trata cu respet y cu dignidad, sino bo recuperacion lo wordo dificulta. Asina importante respet y dignidad ta pa e ser humano.

E ta keda na cada un di nos, sigur den e constelacion di Reino Hulandes, pa para keto un rato y pensa riba kico ta pasando. Nos ta ocupa nos mes ta debati riba condicion, riba fayo, ma cuanto di nos ta pensa riba e respet y dignidad di e ser humano den e momentonan di crisis aki? Esaki ta nos chens di oro pa reflexiona.

•