ORANJESTAD – E pandemia ocasiona pa e virus COVID-19 a trece un cambio drastico den nos economia y nos mercado laboral. En conexcion cu esaki Departamento di Labor & Investigacion (DAO) ta desea di haci un inventarisacion di e situacion laboral y den e cuadro aki ta acerca tur compania pa entrega un Registro di Personal COVID2020.
Basa riba artículo 30, prome inciso, di e Ordenansa Laboral 2013 un dunado di trabou ta obliga pa entrega e Registro di Personal (Personeelsregister) na director di Departamento di Labor & Investigacion ora cu su persona haci un yamada na e compania.
Den e Decreto Nacional Registronan di Ordenansa Laboral 2013 ta regla e modelonan di e Registro di Personal. E Registro di Personal ta consisti di tres parti, Modelo 1A, unda ta yena e personal actual trahando/registra na bo compañia riba 30 juni 2020; Modelo 1B, unda ta menciona e necesidad di personal pa e ultimo mitar di aña 2020 (di juli 2020 pa december 2020), tumando cuenta di e situacion real di nos economia y Modelo 1C, na unda e necesidad di personal pa cada proyecto specifico den e ultimo mitar di aña 2020 ta menciona.
Entrega di Registro di Personal COVID2020 ta obligatorio pa tur compania na Aruba y mester entreg’e den e periodo di 10 di juli 2020 te cu 9 di augustus 2020.
E forma di entrega di e Registro di Personal COVID2020
E unico forma cu por entrega e Registro di Personal COVID2020 ta den e forma digital. Desde 9 juli 2020 por download e formulario digital, Registro di Personal COVID2020, cu ta consisti di 3 pagina for di website www.daoaruba.com of www.gobierno.aw of por haci un peticion via e-mail na aanvraagpr@gmail.com y DAO lo mail bo e formulario digital.
Den caso cu bo compania tin un of mas sucursal/ filiaal, DAO ta haci un peticion pa yena e Registro di Personal no solamente pa e oficina principal (hoofdvestiging) (p.e. kvk-nummer 5555.0) pero tambe pa cada sucursal/ filiaal (p.e. kvk-nummer 5555.1, 5555.2 etc.). Ta wordu pidi tambe pa indica cua trahadonan ta rouleer door di pone un strea (*) den kolom patras di e kolom “No.” ariba e formulario digital.
DAO ta informa cu ta obligatorio pa yena tur 3 modelo. Den caso cu no tin necesidad pa personal of necesidad pa personal pa cada proyecto specifico pa 2020, ta yena nihil ariba modelo 1B y modelo 1C.
Unda y con por entrega e formulario di Registro di Personal COVID2020
DAO ta haci un peticion pa hinca e datonan den e formulario digital, segun e modelo stipula pa ley, y manda nos esaki na e-mailadres dao.prcovid2020@gmail.com.
DAO lo manda e compania un e-mail como comprobante cu a ricibi e Registro di Personal COVID2020. Tene cuenta cu si bo a entrega e Registro di Personal 2019-2020, tambe bo mester yena atrobe e Registro di Personal COVID2020.
Den caso cu e Registro di Personal COVID2020 no ta corectamente yena y DAO a comunica esaki na e compania pero e compania no a adapta e Registro di Personal, lo considera esaki tambe considera esaki un incumplimento di parti di e compania.
Pa companianan cu ta haci uzo di un intermediario (p.e. accountings- of adviesbureau) ta recorda nan cu cumplimento di nos leynan laboral ta un obligacion di e dunado di trabou y no di e intermediario.
Companianan cu no ta cumpli cu entrega di e Registro di Personal COVID2020 aki den e periodo menciona como tambe esnan cu no a entrega esaki e aña anterior ta den incumplimento cu articulo 30 di e Ordenansa Laboral 2013. DAO lo bay over pa tuma accion contra esakinan despues di e fecha di 9 augustus 2020.
E compania lo ricibi un sancion administrativo di Afl. 5.000,- pa no cumpli cu e obligacion di entrega di e Registro di Personal COVID2020.
Si tin mas pregunta tocante e Registro di Personal por tuma contacto cu Sra. Louisetty Croes na 5237722 of via email louisetty.croes@aruba.gov.aw of dao.arbeidsmarktaruba@gmail.com of cu un funcionario di Bureau Arbeidsmarktonderzoek na 5237720.
