Hulanda— Señor Eddy Paris a expresa su mal contento cu Gobierno di Hulanda pa e forma no democratico y falta di transparencia cu ta actuando contra nos pais. Alabes, señor Paris ta elogia nos Prome Minister Evelyn Wever-Croes pa e manera cu el a Sali den e arena pa enfrenta e situacion aki den Conseho di Minister di Reino na Hulanda diabierna awo.

Señor Eddy Paris: “Mi no por keda sin expresa, un biaha mas, mi admiracion pa un gran dama y lider kende awe a yega Hulanda pa enfrenta mañan un Rijksministerraad cu via un manera cu ta carece di principionan democratico kier kita e poder di nos ciudadanonan y nos Parlamento y pone esaki den man di un Troika; 3 ambtenaar na Den Haag.

Ta facil pa para na banda, sconde na cas, y critica. Pero manera e speech mas popular di Presidente Mericano “Teddy” Roosevelt a bisa na aña 1910; “no ta esun cu ta solamente para un banda y critica ta conta, tampoco esun cu ta punta dede riba e posibel fayonan humano (di nos Premier), no, e credito ta bay na e persona cu ta durf di drenta e arena, e credito ta bay na e persona cu ta purba cu su sudor y hasta sanger pasobra e sa cu e causa ta uno noble pa su Pais!”

Ami no ta contra un supervision financiero. Sinembargo mi ta contra e falta di transparencia di parti di nos EU Member-State Hulanda, cu ta actuando encontra di tur principio democratico!

Mi a consulta algun dia cu expertonan huridico di EU Commission encarga cu Overseas Countries and Territories of the EU, tambe cu OCTA (Association of the Overseas Countries and Territories of the EU) y awe mes un carta lo sali pa e Presidente di Comision Europeo – Sra. Ursula von der Leyen pa denuncia e falta di principionan democratico y falta di bon boluntad di parti di Hulanda.

Copia di e carta aki lo bay tambe pa Commissioner Urpilainen (encarga cu OCTs) y pa Member European Parliament Rafaela (NL) y Bijoux (FR), tambe pa European Parliament OCT Friendship Group.

Como futuro Presidente electo di e Comite Ehecutivo di OCTA lo mi percura tambe pa e Joint World Bank- IMF Debt Sustainability Framework for Low-Income Countries bira un prioridad riba nos agenda. Asina so nos lo por garantisa tambe cu Aruba lo por cumpli cu nos obligacionnan financiero, cumpli cu e UN SDGs pa aña 2030 y e von der Leyen Agenda pa un Union Europeo -inclusivo- dus pa extension tambe Aruba!”.