Diaranson mainta a tuma luga un cumbre entre Gobierno di Aruba y gremionan sindical y empresarial cu e topico ‘Condicionnan di Hulanda pa cu ayudo financiero den cuadro di corona virus’. E encuentro aki por a wordo sigui via television y medionan social. Di e manera aki, Gobierno di Aruba, na un manera transparente a haci posibel pa tur hende por sigui e encuentro aki pa asina e informacion a yega tur caminda.
Prome Minister Evelyn Wever-Croes a habri e cumbre dunando un relato di e maneho di Gobierno di Aruba desde cu e virus corona a haci entrada na nos pais lagando nos pais den crisis financiero y economico. Prome Minister a splica e trayecto cu Gobierno di Aruba a pasa pa e ayudo financiero di Hulanda. Pa e di tres tranche, Gobierno di Aruba dialuna mainta a ricibi e document di 218 pagina cu ta contene 18 condicionnan cu e condicion cu Gobierno di Aruba mester duna un contesta na Hulanda den 4 dia.
Gobierno di Aruba, den tur transparencia a invita gremionan sindical y empresarial pa hunto den consulta tuma decision riba e contesta pa Hulanda. Lineanan grandi di e documentonan a wordo discuti den e encuentro. Hulanda kier un compromiso di Gobierno cu lo acepta e condicionnan y pa despues crea e draagvlak. Mientras cu Hulanda mes ta insisti cu mester ta transparente, e procedura y documentonan di Hulanda a bay den tur secrecia, loke Prome Minister a enfatisa, e no ta di acuerdo cu e manera di procede aki. Prome Minister a pidi Hulanda pa nan kita e secrecia di e documentonan pa asina e por comparti cu tur hende, pero durante e cumbre ainda no a ricibi contesta di Hulanda.
Sr. Derrick Werleman, Director di Departamento di Finansas a duna un presentacion detaya riba e situacion financiero di pais Aruba cu Covid-19 a ocaciona.
Sr. George Croes director di Departamento di Legislacion y Asunto Huridico, DWJZ a duna un presentacion tocante e Entidad nobo cu Hulanda kier implementa pa Aruba, Corsou y Sint Maarten.
Durante ora di palabra liber, lidernan sindical y di gremionan a haya oportunidad pa hiba palabra y duna nan remarkenan. Prome Minister na su turno a contesta preguntanan cu a wordo haci.
Un reunion cu, apesar di e presion, a bay den bon direccion na unda cu pueblo tambe por a sigui esaki totalmente y asina keda na haltura di informacionnan brinda y desicionnan tuma.
“Por conclui cu gremionan tambe ta di opinion cu tanten no tin transparencia, nan tampoco por duna nan opinion. A wordo enfatisa pa tanto Gobierno di Aruba y tur e lidernan presente, cu autonomia ta algo hopi importante y ta locual cu a percura pa e desaroyo economico di nos pais. Ta mustra si cu awor nos no tin otro opcion. Gremionan a indica cu reforma ta necesario y a pidi Gobierno pa insisti pa e documentonan wordo haci publico”, Prome Minister Evelyn Wever-Croes a duna di conoce.
