E crisis na Aruba ta birando dia pa dia mas pisa. Hopi hende pasando den duro. Hopi compania cu mester a cera porta. Hopi hende ainda na cas sin pago. Y apesar cu Gobierno di Aruba mesora a sali na vanguardia di e pueblo cu di un dia pa otro a perde entrada masalmente, nos ta tres luna y mey despues y ainda no tin solucion permanente na bista. Si no ta pa e 5% cu e ambtenaarnan a entrega y pa e 25% cu minister-y parlamentarionan a entrega, awe lo no tabata posibel un FASE pa nos pueblo cu ta na 0 entrada. Pues ta henter e Aparato Gubernamental cu a sali na bienestar di nos Pueblo. Esaki ta algo admirabel, di gradici y aprecia.

Pa a atende cu e problema aki, Minister Glenbert Croes mesora a anuncia FASE, un proceso cu di berdad no a bay sin su problemanan pero cu un intencion genuino pa yuda nos hendenan mantene nan trabou/entrada. Despues Gobierno di Aruba a introduci subsidio di salario (loonsubsidie). Otro proceso cu tambe a bay cu su confusionnan pero tambe cu intencion sincero.

Gobierno a introduci ayudo financiero pa Midden- & KleinBedrijf (MKB) pa por yuda companianan cubri nan gastonan operacional. Ademas di tur esaki a introduci e ayudo di FASE pa ZZP (Zelfstandige Zonder Personeel) pues comerciante independiente sin trahado. Pa cera e circulo di ayudo recientemente Minister Glenbert Croes a informa cu a haya apoyo unanime di Parlamento di Aruba pa por yuda Fundacion pa nos Comunidad cu AFL 750.000. Pa efectivamente logra esaki, Minister Glenbert Croes mester a schrap e resto di su presupuesto di aña 2020 pa por  acumula e suma necesario pa por yuda cu pakete di cuminda pa nos comunidad tambe.

E compromiso firme t’ey pa sali na vanguardia di nos pueblo cu ta pasando mester pa dje forma aki purba mas cu por pa minimalisa e daño cu e crisis aki a causa personalmente na nos hendenan.