UPP a tuma nota cu despues di mas di 30 luna cu e gobierno actual ta den funccion, ainda cierto parlamentario cu ta apoya e coalicion, keto bay ta keda haci mencion di casonan dudoso y hasta di corupcion cu lo a tuma lugar durante e gobierno anterior. Esey ta obviamente nan pleno derecho, pero kico lo por ta e motibo pa e keda ataka e gobierno anterior, sin cu ta haci nada pa investiga e casonan aki, mientras ta neglisha pa controla e maneho di e gobierno actual? Kizas kier tapa e corupcionnan di Otmar Oduber den e gobernacion actual?
UPP a yega di trece padilanti caba cu ta hopi straño cu e partido di oposicion AVP tambe ta hopi keto riba varios tereno cu UPP a yega di denuncia. Mas straño ta ora cu e nomber di Gigi Helder wordo menciona. Ta pasobra ta na Fast e washmachinenan ta? UPP como partido desde su fundacion a denuncia pa medio di decenas di articulonan y cartanan actonan di corupcion y politica di patronahe den e gobierno AVPOR y cu e mesun empeño a sigui denuncia irregularidadnan den e gobernacion POREDmep. Nos mester te hasta a bay LAR pa obtene e pruebanan pa incrimina Otmar Oduber. Remarcabel ta e silencio hermetico di parti di henter Parlamento! UPP ta spera cu e caso di Flamingo porfin Parlamento lanta for di soño y cuminsa realmente haci nan trabou di controla TUR minister. UPP un partido politico sin representacion den Parlamento, sigur lo sigui controla e gobierno aki tambe. E unico forma pa evita otro desaster financiero y mas patronahe politico, ta keda alerto y haci control debido di e maneho di e gobierno actual! Un trabou cu parlamento lamentablemente a bin ta ignora y ta prefera di keda funcciona como “cheerleaders”!
E atakenan di e parlamentarionan contra gobernantenan di e gobierno anterior tin diferente meta. Cos ta cayente pa e gobierno actual. Continuamente tin problema ta surgi, cu di un forma of otro mester trata na sconde y si no ta posibel tapa. Un stratregia cu semper ta yuda ta ataka e contrincante politico cu e intencion pa desvia atencion y di e forma aki evita di atende casonan dudoso y hasta di corupcion cu ta tumando lugar den e gobernacion awor. Ora cu e strategia pa desvia atencion no ta duna resultado, e parlamentarionan ta cay den un silencio hermetico. Tin diferente ehempel.
E prome ta Serlimar. No a scucha ningun parlamentario di coalicion ta exigi splicacion di parti di e minister actual riba e situacion cu su persona mes a denuncia. Tampoco riba loke Parlamentario Bosman di Hulanda a trece dilanti. Y mucho menos riba loke mi a denuncia cu tur e pruebanan, cu nan tambe a haya.
Otro tema ta e problemanan cu ta rondona FASE. E minister publicamente a admiti cu erornan a sosode y aki tampoco ela wordo yama pa responsabilisa su falta di maneho den Parlamento.
Pakico no a puntra e minister di Salubridad bin splica pakico no por a logra delibera cu Hulanda riba e exigencia pa reduci gasto di AZV perhudicando e asegurado? Pakico no a laga e minister bin splica den Parlamento kico lo por ta otro opcionan cu no ta mishi cu e usuarionan? Igualmente un silencio hermetico riba e procedura di asilo politico di un grupo grandi di supuesto refugiado y e miles di hendenan aki cu NO ta refugiadonan politico, ta keda aki y ta traha clandestinamente y minister di Husticia ta sera wowo pa esaki. Mientras e problema cu esnan deteni door di Guarda Nos Costa ta keda aumenta!
UPP a mustra caba riba e deficit democratico cu tin entre Hulanda y Aruba y gran parti di e culpa ta di nos mesun politico y parlamentario!
Ta prefera di keda bringa otro y no atende cu nan deber pa controla e gobierno y duna un aporte concreto na mehora e situacion financiero-economico. Ta di spera cu awor cu e caso di Flamingo ta tumando lugar, e Parlamento “NOBO” wordo sacudi, lanta for di soño y no laga sobrevivencia di e coalicion y nan puesto den Parlamento prevalece. Awor ta e momento husto pa bin cu un “zakenkabinet” cu lo bin pone ordo y percura pa introduccion di full e scala di leynan cu lo garantisa un gobernacion drechi y e leynan electoral pa baha e deficit democratico existente y fortifica nos autonomia cu Aruba tin desde nos Status Aparte obteni na 1986!
Partido UPP
Booshi Wever
24 di juni 2020
