Prome Minister a clausura e conferencia di prensa di Gobieno di Aruba dialuna anochi garantisando comunidad di Aruba cu den e siguiente fase cu nos ta den pa lanta bek riba nos pia, habri nos frontera, sigui traha pa lanta nos sectornan economico, Aruba y su salud ta keda central.

“Den e ultimo dianan aki nos ta siguiendo mundialmente e desaroyo di e crisis di COVID-19. Loke por constata ta cu no tin un manual pa cu esaki. Varios pais ta atende cu n’e na diferente manera y tin biaha nos ta compara y wordo compara cu otro paisnan. E ta dificil, Aruba tin un otro tamaño cu otro paisnan y Aruba tawata tin un otro strategia y e strategia awe ta loke ta defini y distingui nos di demas paisnan. 

Na Aruba nos a tuma e decisionnan trempan y di tin e strategia di test agresivo y esaki ta locual a yuda nos pa nos a sali di e prome parti na un bon manera. Nos lo sigui cu e testnan agresivo aki. Na e momento aki nos ta pidi tur hende cu tin un sintoma pa porfabor yama bo dokter di cas pa haci un cita pa detecta si bo tin COVID si of no. Pasobra si no tin’e nos por rule e out pero si en caso tin’e pa nos isola e persona di biaha. Y esaki nos lo continua cu n’e, pasobra ta hopi importante pa asina nos drenta den e fase pa prepara pa nos habri nos fronteranan. 

Tambe nos ta haña ainda e pregunta; pakico nos a habri nos fronteranan? Pues e contesta ta senciyo. Na Aruba nos no tin hustificacion mas pa no habri e frontera. Nos a domina e parti di e virus y e crisis. Aworaki nos tin varios luna na 0 caba y no tin hustificacion mas pa frena e desaroyo economico di nos pais. Principalmente nos kier lanta riba nos pianan bek y e unico manera pa haci esaki ta door di habri nos fronteranan.

Pero mi kier garantisa cada ciudadano di pais Aruba, den e fase aki caminda nos ta bay mira pa nos lanta bek riba nos pia, habri nos frontera, sigui traha pa lanta nos sectornan economico, abo y bo salud ta keda central. Esey ta e garantia cu Gobierno ta duna. Loke nos mester ta bo cooperacion pa atene bo mes na e regla di higiena, di laba man frecuentemente, tambe na e regla di distanciamento. Tene distancia di otro persona y si bo tin sintoma, yama bo dokter di cas pa haci cita pa haci e test. Si abo cumpli cu bo parti, nos ta cumpli cu di nos y asina nos lo hiba nos pais dilanti”.