Plataforma Nacional, cu ta consisti di un total di 125 persona, ta haciendo trabounan incansabel y boluntariamente riba e recuperacion economico di pais Aruba. Na comienso di e crisis, Gobierno a atende di un forma rapido cu e aspectonan di salud y humanitario, acercando Hulanda pa un fiansa pa asina por yuda esnan mas afecta. Cu e fiansa aki Gobierno a logra cumpli cu esnan cu a perde entrada y nan trabou. E siman cu a pasa e di dos parti di loonsubsidie a yega pa asina Gobierno por sigui cumpli cu esnan den necesidad.
Gobierno di Aruba a trece profesionalnan na nivel nacional pa traha riba un plan pa cu e recuperacion economico a traves di innovacion. E plan aki tin como meta crecemento economico den un forma innovativo, inclusivo y sostenibel incluyendo e condicionnan necesario pa un economia resiliente den termino largo, mientras lo tin cu cuminsa mira beneficionan den termino corto y mediano.
Gobierno a institui e ‘Recovery and Innovation Committee’ cu tin como tarea pa desaroya;
e vision di un economia transforma; reformanan structural cu tin como condicion pa e recuperacion, stabilidad, y crecemento economico sostenibel; identifica sectornan strategico (nobo) cu ta trece un balor agrega na nos economia y cu ta brinda un maneho pa guia decisionnan riba inversionnan grandi den sector priva y publico den futuro.
E comision di ‘Recovery and Innovation’ ta consisti di representantenan di sector priva, publico, academico y civico cu mas di 125 voluntario trahando pa bin cu un “masterplan” cu ta encera diferente conseho y recomendacionnan pa e reformanan y cambionan structural cu ta necesario pa hiba Aruba den e direcion economico nobo. E “masterplan” aki ta tuma na cuenta tur e trabounan cu a ser haci anteriormente door di e otro comisionnan; entre otro e National Strategic Plan 2020 – 2022 pa acelera e implementacion di e Sustainable Development Goals (SDGs) di Nacionnan Uni (NSP), e ROP y varios conseho cu Gobierno a ricibi di diferente instancia, por ehempel, Raad van Advies, SER, gremionan y NGOs
E resultado ta e stipulacion di e metanan principal pa cada area economico, lo a completa un analisis concreto di e problemanancu lo por stroba Gobierno di yega na e metanan aki y bin cu consehonan y solucionnan cu por tin e impacto positivo mas grandi.
E strategia aki no ta “business as usual” y ta rekeri pa bin cu ideanan “outside the box” ora di defini e meta, problema/retonan y tambe ora di pensa riba solucionnan mientras cu ta revisa y uza rapport, conseho y ideanan existente.
Gobierno a bin cu e strategia di traha cu un cantidad grandi di boluntario pa asina por trece na comunidad kico te e deseonan pa asina nos por sobrevivi, stabilisa y crece nos economia. Actualmente e diferente “task force” nan ta den e fase final di e proceso y ta premira cu e rapport y plan final lo wordo entrega na Gobierno di Aruba pa final di Juni.
Siman pasa tabata tin 2 Town Hall Virtual unda cu diferente Task Forces a duna un update di nan trabounan y contesta preguntanan di publico tocante nan recomendacionnan. Mas cu 500 persona a participa na e town hallnan. Por mira e grabacion di e Town Hallnan online riba Facebook di Gabinete Wever-Croes.
Premier Evelyn Wever-Croes: “Gobierno di Aruba ta gradici tur participante pa nan contribucion di un forma of otro na e proceso aki. Nos ta aprecia y ta balora boso tempo, esfuerso, aportacion y ta sumamente agradecido pa boso dedicacion den e momentonan aki unda cu como pais nos ta enfrentando retonan nunca bisto”.
