REFINERIA
Dialuna 8 juni a tuma luga e lansamento di e destaho publico pa un operador nobo pa e refineria di Aruba, of otro desaroyo. Interesadonan tin 6 siman, pues te 17 juli, pa entrega nan expresion di interes. Despues lo tuma 4 siman pa evalua y pa mita di augustus lo anuncia si tin suficiente interes y den ki direccion. Despues lo cuminsa e fase di negocia cu esnan cu a duna e miho oferta, pa yega na cera un contract. E paso aki ta crea confiansa den e esfuersonan di Aruba creando un pilar economico solido y diversifica.
REACTIVA ECONOMIA
Siman pasa diamars y diaranson e comision encarga cu recuperacion economico, Commissie Herstel en Innovatie Aruba, a organisa dos Town Hall virtual unda cu a duna un update riba e trabounan di e Comision. 500 persona a participa y por a scucha den ki direccion e taskforcenan ta bayendo y nan por a duna nan comentario y contribucion.
ENSEÑANSA
Alumno, mayornan y maestronan di Skol Paso pa Futuro a bin Bestuurskantoor cerca Premier Evelyn Wever-Croes pa entrega un carta y nan por a expresa nan preocupcion. Premier a gradici nan pa na forma hopi trankil y netjes cu nan a trece nan puntonan padilanti y lo atende cu e puntonan mas pronto posibel
DIA DI FILIPINAS
Diadomingo nos a celebra di 122 aña di independencia di Filipinas cu e comunidad Filipino na Aruba. Un bunita celebracion cu Pastor Juancho na Misa Santa Anna na Noord. Pabien na e comunidad Filipino.
SINDICATO
Siman pasa tabata tin basta inkietud di parti di sindicatonan relaciona cu e tema di cortamento di salario di empleado publico y tambe debi na cambionan den enseñansa. Gobierno y ministernan individual a reuni varios biaha cu sindicatonan y a trece trankilidad. Apesar di e situacion dificil cu nos pais ta atravesando y apesar cu ta trata condicionnan impone pa Hulanda como condicion pa Aruba por haya fiansa, e caminda di dialogo semper ta e miho caminda, contal cu tin respet, comprension y disponibilidad pa yega na otro.
HOSPITAL
Debi na un candela na dr. Horacio Oduber Hospital diamars ultimo mester a evacua tur pashent, algo cu a pasa pa prome biaha na Aruba. E Situacion na Hospital ta bou di control mientras tanto. Pashentnan por a bay bek paden y ta OK. Atencion di urgencia ta wordo duna na IMSAN den bon cooperacion cu Hospital. Un palabra di danki na tur esnan cu ta traha na hospital, na Brandweer, Marina Real, Crisisteam y tur esnan cu a yuda. E forma con henter e ekipo a lora manga y traha hunto poniendo e pashent central, ta hopi bunita.
GRADUACION HAVO Y VWO
Na Faro Blanco Restaurant a tuma luga e entrega di diploma di VWO y HAVO di Colegio Arubano. Como parti tradicional di e ceremonia, Prome Minister a entrega e diploma na e miho graduado di VWO Pricilla Quandt y HAVO Denise Mulder. Premier a felicita e graduadonan y nan famia y a desea nan tur cos bon den e etapa nobo cu nan ta drentando. Premier a recorda nan cu unda cu nan bay, nan ta embahado di Aruba.
REACTIVA TURISMO
Premier Evelyn Wever-Croes a compaña colega Dangui Oduber pa un “approval run” na airport pa mira tur e cambionan haci pa cumpli cu reglanan vigente pa habri frontera. Hopi preparacion y dedicacion. Areopuerto di Aruba ta prepara y cla pa ricibi bishitantenan atrobe. Tur protocol di higiena y distancia social y fisico ta na luga. Hotelnan tambe a cuminsa habri porta y mustra con nan ta atene nan mes na e reglanan nobo.
Hopi trabou a wordo haci pa e preparacionnan y Premier a keda impresiona.
Mientras tanto e ultimo patient di Covid a sali for di hospital y Aruba ta COVID-FREE pa algun siman caba.
Nos ta bay habri nos fronteranan bek. Esaki despues di hopi deliberacion y preparacion. Nos ta sigui tur conseho y lo tuma tur precaucion. E ta costoso, pero nos mester haci’e pa lanta nos pilar economico bek.
Tin hende ta contento, otro ta preocupa. Ta comprendible. Unico forma pa nos sali di esaki ta si nos tin fe, confiansa y pasenshi.
