E efecto di e candela ta mucho mas grandi y lo tarda algun dia mas

Diamars atardi a surgi un candela na e edificio dilanti na Hospital unda construccion ta tumando luga. Manera anuncia previamente a logra contene e candela na tempo y a logra evacua y zorg pa tur pashent y empleado ta safe. Na prome instante a pensa cu e lo tarda no mas di 48 ora pa tur cos normalisa pero esaki no ta e caso. E efecto di huma cu a keda ta bastante y e calidad di aire no ta completamente safe pa habri porta y brinda tur servicio manera normal.  

Orario di bishita ta sigui suspendi te cu proximo aviso. Mirando cu tin algun camber cu tin 3 pashent awo interna no por permiti aglomeracion. Logicamente tin excepcion pa algun pashent cu ta mas malo.

Si mester asistencia di Departamento di emergencia por fabor acudi na ImSan tambe te cu proximo aviso.

Servicio di MRI, CTscan ta ser atendi solamente cu cita. E entrada pa MRI y CTscan lo ta na e parti patras unda normalmente tur pashent di dialyse ta drenta. Ora yega na e security e lo guiabo unda bo persona tin cu meld.

Si bo tin cu busca un remedi na Botica di HOH por fabor yama prome na 527 4538 y e personal di Botica lo guiabo.

Servicio di LABHOH tambe ta ser suspendi te cu proximo aviso, pues si bo tin cita bo lo ricibi un yamada pa asina traha un cita nobo.

Operacionnan planea tambe a ser suspendi te cu poximo aviso. Si un mama tin cu duna luz e por acudi via e entrada di emergencia di Hospital y lo una guia pa e luga concerni. 

Si bo tin cita cu un specialista na un di e policlinica nan pafo di Hospital por acudi na esaki trankilamente.

Un bes mas HOH kier a gradici tur hende cu di un of otro manera a saca man y yuda durante e ultimo dianan aki. Un teamwork impresionante y di kita sombre. Hopi trabou duro tras di cortina pa asina nos por logra habri nos portanan back na publico lo mas pronto cu ta posibel.