Den pasado ora tawatin preocupacion cerca Sindicato di Polis (SPA) pa loke ta trabounan di RST relaciona cu Cuerpo Policial, nos como Parlamento, a dialoga cu sindicato pa yega na un solucion. E biaha aki no lo ta diferente. Nos lo scucha nan puntonan di preocupacion y dialoga cu nan pa por tuma e mihor desicion na bienestar di Aruba. Aruba no ta consisti di un partido politico so, di un Gobierno so, di un compania so of di un sindicato so. Pues ta importante pa tuma tur puntonan relevante den consideracion pa tuma e mihor desicion pa pais Aruba.

PUNTONAN DI PREOCUPACION

E puntonan di preocupacion di SPA tin di haber cu articulo 3 y articulo 7 di e ley pa ehecuta e rebahonan salarial di e empleado publico (Landsverordening tijdelijke versobering bezoldigingen en voorzieningen overheid). Articulo 3 ta reglamenta e rebaho salarial, dentro di e “bezoldiging” cu 5%. Y articulo 7 ta reglamenta e manera con lo atende cu cambionan di e porcentahe si esaki lo ta necesario. Segun sindicato e ley actual lo “bypass” Parlamento y esey ta nan preocupacion di mas grandi.

ARTICULO 7 DI E LEY EN CUESTION

Den articulo 7, eerste lid, ta para cu sumanan y porcentahenan en cuestion por ser cambia segun un “landsbesluit, houdende algemene maatregelen” (Lbham). Normalmente esaki ta un autoridad duna na Gobierno pa cual no mester bin bek Parlamento. Sinembargo, den e caso specifico aki, den e tweede lid di articulo 7, a incorpora un asina yama “voorhangprocedure” cu ta bisa cu e concepto di e Lbham mester bay Parlamento prome, pa asina durante 10 dia Parlamento tin oportunidad pa duna nan remarke y obhecionnan na Gobierno. Pues den e caso specifico aki Gobierno no ta “bypass” Parlamento y e proceduranan aki no ta inusual pa casonan asina.

Durante e 10 dianan aki cada miembro tin derecho di haci pregunta, yama reunion di comision fiho, solicita reunion publico, y te hasta un reunion di comision central den cual fraccionnan por vota y asina por haya sa si tin sosten pa e cambionan a base di voto.

RAAD VAN ADVIES

Importante pa remarca tambe ta cu e concepto di ley aki a encamina e procedura y Raad van Advies mes a recomenda pa eleva e procedura pa uno segun Lbham, enbes di solamente un Lb. Tambe mi mester remarca cu Raad van Advies a duna di conoce den nan conseho, pa loke ta articulo 7, cu nan ta dispuesto y capacita pa duna “spoedadvies” riba un posibel Lbham.

Nos no mester lubida cu bezoldiging di TUR ambtenaar ta regla caba den diferente Lbham’s, pues si Gobierno kier a “bypass” Parlamento lo el a sigui e caminda regular pa efectua e rebahonan salarial. Pero no a scohe e caminda aki pasobra Gobierno ta respeta nos estado di derecho. Por ehempel e “Landsbesluit bezoldiging rechtspositie ambtenaren” no conoce un “voorhangprocedure”, pues a scohe pa incorpora un procedura aworaki cu ta garantisa involvimento di Parlamento.

PA CONCLUI

Mi persona tawatin un bon combersacion awe cu e lider sindical di SPA y dentro di poco nos lo reuni cu sindicato riba nan puntonan di preocupacion. Ta importante pa nos keda dialoga aworaki pa asina nos yega na solucionnan cu ta cumbini pais Aruba y henter pueblo.

Parlamento tin tur instrumento na su disposicion cu e por uza si e ta haya necesario pa haci cambio den e ley. Ta keda pa e mayoria aproba of desaproba e ley. E debate cu e Ministernan concerni lo ta determinante pa evalua y tuma decicion na bienester general di nos pais.