Lo tuma mas o menos 48 ora pa tur cos normalisa

Diamars atardi a surgi un candela na e edificio dilanti na Hospital unda construccion ta tumando luga. Team di Hulperverleners di HOH a actua inmediatamente en espera di Brandweer cu a yega rapido y a logra  contene e candela. A evacua di biaha tambe tur pashent segun emergencia y a traha luga den otro localidadnan riba tereno di Hospital pa sigui brinda cuido. Dokter nan a analisa cada caso y asina a dicidi cua pashent por bay cas y cua pashent tin cu keda interna. Un evacuacion cu a bay sublime na unda prioridad tabata pa tur pashent y empleado ta safe. Algun piso ayera nochi ya tabata safe pa haci uzo di nan y a muda e pashentnan cu ta mas grave paden back manera ICU.  Pa e proximo 48 ora nan lo traha duro pa loke ta limpiesa y alabes midi e calidad di aire te cu e ta completamente safe pa muda tur pashent back den e edificio di Hospital.

Si mester asistencia di Departamento di emergencia por fabor acudi na ImSan pe proximo 24 pa 48 ora na unda personal di HOH hunto cu personal di ImSan ta cla para pa brinda cuido. 

Mayoria di servicio cu ta ser brinda den e edificio di Hospital ta suspendi pe proximo 48 ora nan excepto servicio di MRI y CTscan. Si bo tin un cita pa MRI y CTscan por fabor acudi na e entrada di Departamento di emergencia y eynan personal di HOH lo guiabo. Tur e otro servicionan di radiologia, revalidatie etc ta suspendi pe proximo 48ora. Servicio di LABHOH tambe ta ser suspendi pe proximo 48 oranan, pues si bo tin cita bo lo ricibi un yamada pa asina traha un cita nobo. Otro servicio cu ta ser brinda den e Medical Office Building ta sigui normal.

Tambe ta suspende orarionan di bishita pe proximo 48ora nan. Mirando cu tin algun camber cu tin 3 pashent awo interna no por permiti  aglomeracion. Ta tumando contacto cu miembronan di famia pa asina duna nan mas informacion. Logicamente tin excepcion pa algun pashent cu ta mas malo.

Operacionnan planea tambe a ser suspendi pe proximo 48 ora nan. Solamente lo tuma luga operacionnan di emergencia na HOH. Y tambe si un mama tin cu duna luz e por acudi via e entrada di emergencia di Hospital y nos lo guia pa e luga concerni. 

Si bo tin cita cu un specialista na un di e policlinica nan pafo di Hospital por acudi na esaki trankilamente.

Gratitud ta bay na tur trahado di HOH, pero tambe Brandweer cu Polis y e crisisteam cu a traha ayera duro y awe ta sigui cu e proposito pa salvaguardia siguridad di tur pashent. Un danki grandi ta bay tambe na e team completo di ImSan cu a habri nan porta pa team di emergencia di HOH pa asina por sigui brinda cuido y alabes a mantene nan departamento di Radiologia habri ayera nochi. No por keda sin menciona cu pa prome biaha un operacion di emergencia a tuma luga na ImSan cual a ser ehecuta pa team di HOH hunto cu team di ImSan. Danki na tur hende pa nan aporte durante e crisis cu a surgi na HOH.