Den conferencia di prensa di Gobierno di Aruba dialuna anochi, señora Glenda Hernandez, Director di Departamento di Asunto Social a duna un relato tocante e proceso di apertura di scolnan na Aruba treciendo hopi claridad den e maneho cu a hiba pa habri scol bek den fase pa asina nos por bay bek na normal teniendo cuenta siguridad di nos muchanan.

1. Cluster 4 den structura di calamidad

Sra. Hernandez ta president di Cluster 4. Departamento Social ta encarga cu ‘Bevolkingszorg’, esta e cuido di nos populacion ora un calamidad sosode. Den e calamidad di Covid-19 a tuma e decision cu scolnan lo cay bou di encargo di Cluster 4.

2. Proceso di apertura di scolnan hunto cu ‘schoolbesturen’:

Fase 1 pa apertura di scolnan a cuminsa comienso di mei 2020 unda a sinta tur siman cu mayoria di ‘schoolbesturen’ y a palabra tur e desicionnan tuma den Team Maneho Crisis. A pidi tur e schoolbesturen pa habri 18 di mei y si esaki no ta posibel, pa nan bin cu un plan con nan lo bay duna les na muchanan cu no por wordo alcansa door di enseñansa digital of di otro modo, di cual ta un grupo grandi. A pidi tambe atencion di e schoolbesturen con nan lo atende cu e muchanan cu tin problemanan social emocional na cas. Apesar cu Fase 1 a cuminsa na comienso di mei, a habri efectivamente e scolnan entre 25 di mei y 1 di juni, scolnan basico, special y kleuter, esta 1 luna mas despues.

Fase 2 a cuminsa e di 3er siman. E Team di Maneho hunto cu DVG a sinta pa discuti kico ta e riesgonan si scol habri pa muchanan bou di 12 aña. Esey a conduci na tuma un decision pa habri scolnan 100% den e siguiente fase, esta dia 8 di juni! Esta 2 siman despues!

Sra. Hernandez a remarca cu mescos cu apertura di tiendanan, apertura di scol tambe a pasa den fase. Team Maneho di Crisis a tuma tempo pa haya y discuti tur informacion di riesgo y siguridad. Scolnan tambe a haya tempo y poco poco mester a cuminsa habri scolnan bek. Ora un pais ta den un ley di calamidad, e situacion por cambia di un momento pa otro. Por lo tanto, mester tin e flexibilidad pa actua miho of mas lihe posibel.

“Mi ta comprende tur e trabounan cu a wordo haci door di nos maestronan. Mi ta pidi comprension tambe cu nos ta sigui pa apertura total y bay na un situacion normal teniendo cuenta cu tur riesgo y siguridad pa habri scolnan bek. No ta zomaar nos ta tuma decision”, Sra. Hernandez a expresa.

3. Sindicatonan: E ekipo bou encargo di Sra. Hernandez a sinta tambe cada siman cu e sindicatonan Simar y Seppa, aunke estrictamente un structura di calamidad no ta reconoce un rol specifico pa sindicato. Pasobra den un calamidad mester tuma decision cla y actua lihe!, Sra. Hernandez a enfatisa.

Sra Hernandez a bisa acerca cu na momento cu un pais tin un calamidad tur maneho nobo ta wordo para automaticamente y na e momento ey ‘opperbevelhebber’ cu ta Minister Presidente lo tuma over.

Conclusion: Pa conclui, Sra. Hernandez a remarca y a reconoce cu tin un gap grandi den informacion entrée e schoolbesturen y e veld di enseñansa durante e calamidad di Covid19. Pa e motibo aki, den e siguiente 3 lunanan hunto cu BRA, lo traha un structura di calamidad pa enseñansa unda lo tin un rol delinia pa e diferente stucturanan cu nos conoce den ensenansa, entre otro tambe directornan di scol por duna advies na e Team di Maneho.