ORANJESTAD – Directie Natuur en Milieu (DNM) ta uni su mes na e yamada di e organisacionnan mundial, manera United Nations Environment Program y UN Environment pa loke ta trata nan campaña di conscientisacion den cuadro di e pandemia COVID-19.
E pandemia di COVID-19 a pone nos realisa cu salud di e ser humano ta estrechamente conecta cu salud di nos planeta. Mester tene na cuenta cu coronavirus ta un virus zoonotic, kiermen cu e ta wordo transmiti di bestia pa hende. Pa preveni situacionnan asina den futuro, nos mester combati e menasa na nos ecosistema y biodiversidad, incluyendo fauna salvahe, perdida di habitat, traficacion ilegal di bestia, polucion y cambio di clima. Door di haci esaki y tambe cambia nos manera di pensa, por tuma e accionnan necesario pa proteha y salvaguardia coexistencia di nos planeta.
Kico ta e normal nobo despues di e pandemia COVID-19 pa loke ta trata nos naturalesa y medio ambiente?
Pa por sali di e situacion aki na un manera fuerte ta nifica cu comunidad mester ta uni den un solo meta ora ta trata di asunto relaciona cu nos naturalesa y medio ambiente. Cu otro palabra, pa por desaroya na un manera sostenibel mester aplica e concepto di “triple bottom line”. Pues na luga di un solo bottomline (cu ta ganashi), tin tres cu ta: hende, nos planeta y ganashi. “Triple bottom line” ta un teoria cu ta recomenda e companianan pa nan compremete nan mes na pone mesun atencion na problemanan social y di medio ambiente, cu nan ta pone na haci ganashi. Esaki tambe kiermen cu mester yega na acuerdonan den consulta mutuo, pa asina cu e accionnan cu ser tuma, ta contribui na humanidad (responsabilidad social), prosperidad (economia) y planeta (un medio ambiente y naturalesa sostenibel). Pues ta trata di e actividadnan economico unda ta uza menos recurso cu antes (e periodo prome cu e pandemia). Ora ta ehecuta maneho economico mester percura pa tin menos impacto y presion riba e recursonan di medio ambiente y naturalesa. No por ta asina cu ta sigui desaroya sin ta sostenibel of sin tene cuenta cu nos bienestar y e recursonan natural. E grafico adhunto tocante “decoupling” ta ilustra con ta posibel pa tin mas crecemento economico cu menos uzo di nos recursonan natural, como tambe cu menos impacto riba nos medio ambiente. Como resultado lo tin tambe un aumento den nos bienestar. Asina por logra e normal nobo desea pa naturalesa y medio ambiente, door di haci mas cu menos.
Cu otro palabra no por sigui cu e pensamento cu ta “business as usual”, kiermen cu tur cos ta keda manera custumber. E di dos grafico “Let’s flatten this curve too” ta ilustra cu mester flatten the curve pa loke ta trata e manera di pensa cu tur cos ta keda igual, pues manera custumber. Nos mester flatten the curve na e capacidad cu nos planeta por carga. Y e unico manera cu nos tin pa logra pa flatten the curve ta pa haci sostenibilidad nos prioridad, pasobra si nos sigui cu e pensamento di “business as usual” nos planeta ta core riesgo. Ora ta pone sostenibilidad como prioridad, lo tin menos riesgo pa naturalesa y medio ambiente riba termino largo. Esaki ta exigi un cambio di mentalidad, un manera nobo di pensa, pa un normal nobo. Ta keda na cada un di nos pa adapta na esaki.
Directie Natuur en Milieu ta sali di pensamento cu e normal nobo ta encera maneho y forma di pensa basa riba sostenibilidad como prioridad, pa asina nos planeta tin e capacidad pa por carga nos na termino largo sin abusa of haci mal uzo di e recursonan y servicionan cu nos planeta ta brinda nos.
Riba Dia Internacional di Medio Ambiente 2020 cu a tuma luga riba 5 di juni, e organisacionnan mundial a urgi pa pone enfasis riba tempo pa naturalesa, pa ta un cu naturalesa, pa apoya, yuda y cuida nos naturalesa.
