Diabierna ultimo partido POR a comete suicidio politico. Tabata conoci cu e partido tabata nabega caba door di lama bruto, pero a cuminsa cuestiona sobrevivencia di e partido ora e lider a disidi pa bandona “the sinking ship”. Parce cu e lider sinembargo lo a kere cu elo por a confia ciegamente toch riba e solidaridad y loyalidad di su coleganan minister di partido. “El tiro le salió por la culata”. Un minister parce di a yega na e conclucion cu apoya e maneho di e lider lo por a compromete su persona tambe. Na prome lugar pa e cantidad di denuncianan haci contra e lider no solamente local, pero hasta den Tweede Kamer. Cu niun rato a desmentí pero mas bien tabata trata di desvia e atencion.

Mas importante por ta e hecho cu probablemente e minister lo a constata cu e maneho di e lider no tabata “zuivere koffie” tampoco. Algo cu por cierto ela apoya tambe den e ultimo dos añanan y mei.

Ta obvio cu e sra. Lopez-Tromp lo bay ta e otro raton cu ta bandona e “sinking ship” , despues cu e mes personalmente por a mira e pruebanan di tantismo PORkerianan cu a sosode desde december 2017 den Serlimar riba instruccion di Otmar Oduber y pa colmo cu aprobacion di full e gobierno POREDmep y te recientemente e 11 parlamentarionan cu ta sostene e coalicion aki.

UPP a wordo informa cu durante e ultimo conseho di partido POR e “de facto” lider a “set the tone” di e reunion for di comienso te final y cu a tira culpa riba loke ta pasando riba henter mundo menos su mesun persona. Ela menciona na diferente ocacion e nomber di e lider di e partido UPP instigando cu e keho entrega na Ministerio Publico tabata carece di evidencia. Pero straño ta cu e no a etrega un denuncia contra sr. Candelario(Booshil Wever.

Ela menciona cu en berdad e incinerator chikito ta funciona pero no ta den operacion pasobra no tin placa pa cumpra un “sprinkler system” cu ta costa 360 mil florin,  cu ta un exigencia di brandweer. Ela lubida di menciona con ela haci su maximo esfuerso pa desacredita un compania local ferozmente cu tabata haci e trabou pa locual e compania a menasa di bay corte loke a conduci cu mester a yega na un convenio bou mesa pa evita esaki. Ta remarcabel cu te awe e mesun compania ta kima e sludge.

E lider tambe a lubida di menciona cu e tabata tin masha pura mes pa un sponsor di partido haya e deal pa compra di e incinerator aki y pa awor casi un aña despues ainda e incinerator no ta den funcion y ta ainda ta paga e compania 110 mil florin pa luna.

E a lubida tambe di menciona cu den e MB di 28 di november 2018 ta poni den e consideracion cu :

“Dat na evalutie van de huidige contract ten behoeve van her verbranden van het slib wordt geconcludeerd dat de kosten ZEER HOOG zijn”

Raro ta cu HENTER e conseho di minister, particularmente e

 minister Ruiz-Maduro, a bay di acuerdo pa duna e amigo/sponsor e contract aki cu lo nifica un aumento di  110 mil pa por lo menos 285mil florin pa luna, pues un aumento di mas di 250%!!! Aki e dos ministernan aki a bay empugna di e MB cu nan mes a traha.

E maniobranan coruptivo aki di e lider di e partido POR ta bon conoci, pero loke ainda ningun hende kier adresa ta e postura di e partidonan di coalicion MEP y RED. Nan representante den e ministerraad “willens en wetens” a tolera e manipulacionan di e lider sin mas. Den mas di un ocacion a participa publicamente cu ta apoya e maneho coruptivo di e lider y hasta a bay asina leu di demonisa un miembro di partido geel den parlamento ora cu e persona a cuestiona e maneho di Serlimar. Awor cu “the sh… hits the fan” e Prome-Minister di un forma laconico ta declara cu e problema interno di e partido POR no lo afecta e stabilidad di e gobierno. Ta parce cu e Prome-Minister lo kier “laba man” manera Pontius Pilatus, pasobra ta surgi e pregunta con lo mester cualifica e credibilidad y integridad di e Ministerraad si en berdad e lider wordo haya culpabel di a actua di un forma coruptivo. E Ministerraad a para su tras ciegamente, pues no por yega na otro conclucion cu MEP y RED ta mesun culpabel cu e lider di e partido POR.

Aki obviamente e gobierno POREDmep ta hibando un maneho di “CANI MI, PAMI CANI BO”!!