Diadomingo atardi Polis a haya nan ta bai pa e caminda di santo cu ta bai direccion Andicuri pa un auto cu a accidenta drenta mondi. Unabez na e sitio a resulta cu e caso aki tabata un tiki mas complica cu a mustra na promer instante. Ta asina cu un mucha homber jong tabata core den un Jeep Wrangler geel y a ripara cu su ex, mama di su yui tabata core su tras constantemente. Segun informe e persigucion a cuminsa desde Hooiberg caba. Mirando cu su ex-pareha tabata sigie den un auto Nissan March, e a opta pa coi e caminda pa Andicuri, pensando cu eynan e lo perde debi cu e caminda ta hopi malo y e Nissan March lo no por keep up cu ne. Sinembargo riba e caminda di santo cu ta bayendo pa Andicuri, e dama den e Nissan March, sea a purba di manera pa pase of dal den e Jeep, causando cu e a perde control y a drenta parcialmente den e mondi banda di e caminda. Debi na e circumstancianan, technische recherche tambe a bin y ambos partido a wordo conseha pa bai warda mañan pa duna cuenta. Na e sitio mes por a ripara cu e dama tabata blo altera cu e mucha homber, acusando e di diferente cos, te cu Polis mester a usa su authoridad pa pone e dama aleha for di e mucha homber. Esaki no a bai facil, debi na promer instante e dama tabata nenga di sigi e instrucion di polis. E polis a usa su tactica y authoridad y a logra di pone e dama aleha alsnog. Takelwagen a wordo jama pa takel e Nissan March cu no tabata den estado di core mas.
