Oranjestad – 2 di juni 2020 – Durante fin di siman, nos a ricibi bishita di e prome grupo di Subi Jet Pa Bo Get na nos canteen na Camacuri. E programa yama Subi Jet Pa Bo Get y e ta wordo ofreci door di Hogeschool Rotterdam pa asina yuda e studiantenan cu ta bai cuminsa nan estudio serca nan na september proximo. E programa ta yuda e studiante prepara riba diferente tereno entre otro finansas, cultura, heimwee, huisvesting, seguro, soft skills y dimes e estudio mes. Tambe ta yuda nan pa asegura cu nan a rond af tur cos aki nan mane schrijf uit y habri un student account, asegura pa verzamel tur documento cu nan mester bai cune Hulanda. 

E workshops nan ta wordo duna door di nos colega Suzette Bareño, Human Resources Sr. Advisor hunto cu Lisanne Sambo – Gomez, docente di Economia na EPI, caminda nan lo comparti un tiki mas di nan experiencia di nan estudio na Hogeschool Rotterdam. E workshops nan aki ta percura pa e studiantenan sera amistad cu otro y pa asina por duna sosten den e fase nobo aki di nan bida.

Nos ta orguyoso di por a contribui na un programa dedica na futuro studiantenan di Hogeschool Rotterdam y nos ta desea tur hopi exito den e fase nobo aki di nan bida.