E gobernador di Aruba a realisa un bishita di trabao na Kustwacht di Aruba y tambe warda di polis na San Nicolas diamars 19 di mei mainta. Central durante e bishita tabata e impacto di e Coronavirus (COVID-19) den e trabao di servicionan aki.Na comienzo di e bishita, e Gobernador a ser recibi door di e jefe di e Punto di Apoyo (steunpunt) di Kustwacht. Despues di a recibi un breve splicacion di e compromiso actual di Kustwacht den awanan di Aruba, e Gobernador a papia cu varios miembro di e personal di Kustwacht y cu e soldatnan cu actualmente ta desplega na Kustwacht. Debi na Coronavirus, tur frontera maritimo di Aruba ta sera. E medida aki ta unicamente e trafico regula tin acceso na e islanan. Pa mantene esaki, Kustwacht a tuma medidas den forma di patruyanan adicional na terra y lama. Den e ejecucion, Kustwacht ta ser apoya pa soldatnan di e milicia di Aruba (Arumil) y e 32 scuadron di asalto di e cuartelnan di marinierskazerne di Savaneta. E Gobernador a bishita e warda di polis na San Nicolas. Gobernador a papia cu varios agente policial riba nan experencia durante di e Coronacrisis. Debi na e medidanan, cayanan ta mas trankil y esey ta nifica, entre otro, cu e trabao di polis ta algo diferente. Den conversacion, e agentenan a indica ademas cu e medidanan anuncia un luna y mey pasa no a ser tuma na serio pa tur hende na principio. Esaki por tabata relaciona cu e hecho di cu no tur hende a tene suficiente cuenta di cu tabata tin un gran riesgo pa e salud publico. Ultimamente, e polisnan a bin ta ripara cu e cosnan tabata bayendo hopi miho. E hendenan a bira cada vez mas consciente di kiko por y kiko no por haci, e riesgonan cu Corona ta trese pa salud publico y cualnan ta e efectonan den e sociedad. Dependiendo di e desarrollonan, e compromiso di KPA ta ser determina dia tras dia, y den consulta cu e autoridad competente y e organizacionnan asocia. Mediante yamadanan telefonico y, si ta posibel, bishitanan di trabao, Gobernador Boekhoudt a informa su mes di e consecuencianan di e brote di Corona y a expresa su apoyo y agradecimiento pa e compromiso di tur esnan den e lucha contra e pandemia. Medidanan lo ser tuma den consonancia cu e organizacionnan interesa pa garantiza cu e bishitanan di trabao ser realiza den un manera sigur.
