UPP a tuma nota di e intento di ciudadano sr. Atan Lee pa cuminsa cu un accion di colecta firma pa asina exigi un referendum pa por cambia status di nos pais, di uno autonomo pa un di dependencia Hulandes y integracion na nivel di municipio (gemeente).

UPP kier mustra, cu tur respet pa opinion di sr. Lee, cu nos di UPP ta totalmente contra pa di e forma aki nos entrega tur cos den man di Hulanda. Nos di nos banda a keda mas desapunta cu asombra cu e posicion aki. Desapunta, pasobra nos tur sa cu sr. Lee pa hopi tempo a lucha y bringa hunto cu sr. Betico Croes y partido MEP pa asina Aruba logra e status autonomo den Reino Hulandes. Menos asombra si pa e hecho cu despues sr. Lee a bay sostene fervientemente partido AVP, cu kier a haci di Aruba un dependencia di Bruselas, capital di Union Europeo, den forma di un UPG. E mesun partido cu porcierto, te na e momento cu sr. Lee a bay sostene e partido nobo RAIZ, tabata apoya e barbaridad y sakeo di e pueblo aki, hincando nos pais den debenan astronomico. E tempo ey sr. Lee no a sa di sali y bisa e partido berde no tabata pone un debchi un banda pa enfrenta cualkier calamidad.

E posicion aki di sr. Lee, sigur ta liña recta contra loke ta e anhelo di nos pueblo, cu pa mas di 70 aña a bringa pa sali for di opresion Antiyano. Awe e intencion ta pa laga nos bira un “gemeente” di Hulanda, unda cu nos lo ta mas subordina atrobe na den Haag y despues bou di Bruselas. Lo tarda cientos di añanan pa por kibra e dominio Europeo aki. E motibonan cu sr. Lee ta trece padilanti, esta e mal maneho, malgastamento di placa, politiconan probechador cu ta percura pa nan saco so y por ultimo e constante bay roga of mendiga na Hulanda, ta zona hopi valido.

Pero pa UPP esakinan bo por logra cambianan sin tin nodi give up bo autonomia. Nos por percura den nos Status Aparte pa bin cu Bon Gobernacion, “Good Governance”, marando e mannan di e politiconan introduciendo un set di ley cu mester wordo pasa mesora. Bin cu e Ombudsman, Klokkenluidersregeling y Mededingingsautoriteit. Alabes mester mara den ley e porcentahe di “schuldquote” cu nos pais por tin y mescos tambe e grandura di e deficit. Esakinan ta djis un par di leynan cu sea mester cambio of introduci pa por logra mara e mannan di e politiconan. Den e proximo dianan nos dilanti lo sigui informa pueblo riba cua leynan sea mester cambia of cua mester ser introduci pa logra nos meta, esta recobra nos autonomia manera a ser logra na e RTC 1983.

UPP por comprende e frustracion cu ta biba cerca ciudadanonan. E crisis di COVID-19 cu nos ta aden parce di ta pone nos lomba contra muraya y tardi of tempran lo comberti den desesperacion total pa bay asina leu di kier entrega nos derechonan di pais na Hulanda. Ta tristo mira con diripiente tin manera un ola di pensamento nobo riba e rumbo di Reino Hulandes, unda cu un tempo tabata pidi pa Hulanda trata nos como su pareu, awe nos ta wak cu kier papia di un entrego total. E tristo y peligroso ta cu e pensamento aki ta bin di e banda di Reino aki tambe.  UPP a adverti, cu poco poco, si gobierno di Aruba no percura pa bin cu e cambionan riba tereno di gobernacion y nos derecho di estado y politico aki na Aruba, nos mes como politico lo bay ta pidi Hulanda drenta numa y bin mara nos man. E proposicion di un “gemeente”, sigur ta e prome paso .

Nos ta ripara cu tin hopi elogio pa Hulanda pa e “ayudo” na Bonaire, pero nos no ta puntra kico e Boneriano mes ta sinti y pensa al respecto? Kico nan ta pasa aden? Si aki na Aruba nos tin e problema di “estranhero”, cu poco poco, dor di maneho anti-Arubiano ta haciendo e poblacion Arubiano como uno di minoria y di segunda categoria,  na Bonaire ta e “instroom” Hulandes ta haciendo e Bonerianonan “derderangs burgers”!

UPP desde 2012 a bin ta vocifera cu nos mester cera cabes aki na Aruba pa enfrenta Hulanda. Na 2014 nos a propone pa bin cu un Compromiso Nacional, saliendo for di un Dialogo Nacional al estilo RCOA cu sr. Betico Croes a bin cu ne den añanan 80, pa asina nos regla nos mesun cuenta aki na Aruba mes. Anto paso nos kier y desea esaki pa nos propio bienestar,  no pa complace Hulanda. Pero nos preferencianan politico ta keda strobe nos. Nos mes, nos gobierno, ta hibando nos pueblo pa e altar di sacrificio, sin cu Hulanda no tin nodi drenta. Pesey  atrobe nos a haci e proposicion aki, pero parce cu no tin oido pa esaki. Pero e indiferencianan di esnan cu ta den poder aki, ta haci cu tipo di pensamentonan y sentimentonan ta cuminsa brota contra loke nos a lucha, esta ta un pais autonomo.

UPP su punto di bista ta cla y raspa. Nos kier mantene y defende loke ta e KLOMPI di DIAMANTE, pero na mes momento nos kier mara mannan di politiconan aki na Aruba, atraves di introduccion  di reglanan estricto di Bon Gobernacion, Transparencia y Democracia Habri. No tin otro manera. Y esaki nos tin di hacie por medio di un DIALOGO  NACIONAL  pa yega na un COMPROMISO NACIONAL.

Partido UPP

Booshi Wever

11 di mei 2020