ORANJESTAD – Siman pasa SVB a manda un email na tur compania cu ta bin na remarke pa e sosten financiero den forma di subsidio di salario.
Kiko ta Subsidio di Salario?
Subsidio di Salario ta un sosten financiero pa empresanan local cu a consecuencia di e situacion actual causa pa e pandemia COVID-19 ta sufri un perdida di entrada di benta di por lo menos 25%. E meta principal di e programa di Subsidio di Salario ta pa mantene mas trahado cu ta posibel den servicio maske cu tin menos (of no tin) actividad economico y pa garantisa pago parcial di salario.
Ken ta bin na remarke?
E companianan cu ta wordo afecta pa COVID 19 ta ricibi un email di SVB cu e informacion necesario con pa aplica pa e yudansa financiero di sosten di salario. No ta tur dunado di trabou ta bin na remarke pa ricibi Subsidio di Salario. Tin un lista di rekisito cu e dunado di trabou mester cumpli cune. Algun rekisito ta cu e compania mester premira un perdida di entrada di benta pa su compania di por lo menos 25%. E compania mester ta registra na SVB y na Departamento di Impuesto y ta sigui cumpli cu pagonan di impuesto y primanan social. E Subsidio di Salario cu e dunado di trabou ta ricibi mester wordo usa pa paga salario di su trahadonan y e primanan social cu dunado di trabou mester paga.
Ki tempo ta paga?
E Subsidio di Salario lo wordo paga pa luna y tur luna e dunado di trabou mester bolbe aplica pa esaki usando e portal di MiSVb riba www.svbaruba.org. Pa facilita e dunado di trabou y brinda e ayudo mas lihe posibel e Subsidio di Salario ta wordo paga den forma di un adelanto (na Hulandes un voorschot) a base di e perdida di entrada di benta premira pa e dunado di trabou. Despues lo controla y fiha e suma di subsidio a base di entrada real di e dunado di trabou den e lunanan cu e dunado di trabou a ricibi e adelanto di e Subsidio di Salario.
Subsidio di Salario ta mescos cu FASE?
Subsidio di Salario no ta mescos cu FASE y tampoco e Sosten Financiero pa Empresa Chikito y Mediano. Ta trata aki di tres programa di sosten financiero diferente cada un cu su meta y grupo meta.
Bo tin pregunta?
Pa facilita e proceso di aplicacion y contesta pregunta di dunado di trabou y trahador relaciona cu e programa di Subsidio di Salario a bin cu un Service Center. Por tuma contacto cu e Service Center via mail na loonsubsidie@svbaruba.org of via e number di Whatsapp +297 527-2801.
