ORANJESTAD, Aruba – 18 oktober 2019: Inspectie Volksgezondheid Aruba (IVA) a haya notificacion cu e remedi Ranitidine cu ta wordo bendi bou e nomber di Ranitidine y Zantac® di e siguiente fabricanan: Accord Healthcare B.V., Apotex Nederland B.V., Aurobindo Pharma B.V., GSK, Mylan B.V., Omega Pharma Nederland B.V., Sandoz B.V en Teva Nederland B.V. a wordo saca for di mercado. E motibo cu e Ranitidine a wordo saca for di mercado ta cu e ta contamina cu N-Nitrosodimethylamine (NDMA). NDMA ta un kimico cu probablemente por causa cancer. Sinembargo e risico pa haya cancer door di uza Ranitidine cu ta contamina cu NDMA ainda no ta comproba.
Ranitidine ta wordo uza pa persona cu ta sufri di zuur, dolor, kimamento y/of ulcera di stoma.
Si bo persona ta uza e remedi Ranitidine y/of Zantac® cu ta wordo traha door di e fabricanan ariba menciona y a haya e remedi cu un receta di dokter, bo persona lo mester entrega e remedi aki bek na bo Botica y acudi serca bo dokter di cas pa prescribi un otro remedi.
E Inspectora di Remedi, drs. Roselynn Angela (Boticario) ta urgi tur pashent cu a haya Ranitidine cu un receta di dokter pa stop di bebe e remedi inmediatamente y pa hiba e remedi Ranitidine bek pa su botica. Tambe e Inspectora ta pidi tur pashent cu tin pregunta y/of un preocupacion pa tuma contacto cu su botica y/of su dokter cu a prescribi e remedi.
Inspectie Volksgezondheid Aruba lo informa pueblo pa cualkier cambio na su debido momento. E lista completo di e remedinan cu a wordo saca for di mercado por haya riba e website di IVA: www.iva.aw
