Gobierno y sindicatonan a delibera riba aporte pa solidaridad

Diabierna ultimo Gobierno a reuni cu sindicatonan cu ta representa empleadonan y pensionadonan di Gobierno, di companianan estatal y di fundacionnan subsidia, TOPA, SEPPA, SADA, SPA, SIMAR, SIMBA, STA, FTA, STT, UEA, ALVAST, SIWA, OPPA, AVB, SABA. E reunion a bay desde sala di Conseho di Minister, via forma digital cu e mayoria di representantenan sindical.

Minister Presidente Evelyn Wever-Croes a indica cu e crisis aki a dal nos tur fuerte pero cu e tin tur confiansa cu si nos uni, nos lo sali afo. Y a haci un apelacion na sindicato pa duna muestra di solidarismo.

Minister di Finansas Xiomara Maduro a duna un presentacion di e realidad nobo, cu e GDP lo cay cu 44% e aña aki, debi cu 80% di ingreso di pais Aruba ta cay. No mester lubida cu e gastonan pa bringa e crisis di salud tambe tin un costo halto. Por bisa cu Pais Aruba ta bancarota manera e situacion ta awor y e unico forma pa sali afo ta cu ayudo di Hulanda. Pero prome nos mester baha nos gastonan sino nos no lo haya ayudo di Hulanda.

Minister di Labor a expresa cu esaki ta e prijs cu mester wordo paga pa cada trahado di Gobierno y entidadnan di Gobierno, por mantene nan trabou y a pidi sindicatonan pa yuda Gobierno pa por yega na fondo pa rescata nos pais. Sin ayudo di Hulanda dentro di algun siman no tin placa mas pa paga salario di ningun trahado publico.

PROPOSICION: E proposicion di corta gasto a wordo presenta na sindicato.

• Salario di Minister, Parlamentario, conseheronan di Gobierno y directornan di empresanan estatal: ta corta cu 10%.

• Salario di demas empleado publico, di fundacionnan subsidia y empresanan estatal: ta corta cu 5%

• Vakantieuitkering, bonus, premies pa empleado y pensionadonan di Gobierno, fundacionnan y empresanan estatal: ta corta cu 50%

Si bo con ta esakinan hunto, e ta un cortamento total di 12.6% di empleadonan y 15% di minister, parlamentarionan y directornan di companianan

Aparte di esey lo corta den demas gasto di presupuesto, entre otro gastonan di biahe, di representacion, di consehonan externo y di mercadeo, tambe den e Sociaal Crisis Plan.

Esaki mester contribui cu 91 miyon florin como un aporte di solidaridad di sector publico na e 37 mil personanan cu ta perde trabou debi na e crisis.

Sindicatonan a indica cu nan mester papia cu nan miembronan. Tambe nan a pidi ministernan pa entrega mas di loke a wordo proponi, riba cual Gobierno a bisa cu lo haci esaki. Tambe nan a pidi pa yuda baha costo di bida door di mas control den supermercadonan y door di delibera cu Astec y companianan importador pa baha nan gastonan.

Minister Presidente a gradici sindicatonan pa nan aporte y pa nan sugerencianan y a enfatisa cu ta sacrificionan grandi nos cada un mester haci pa hiba nos pais padilanti y ta aprecia cu sindicatonan tambe ta dispuesto di considera pa duna un aporte di solidaridad. E reunion lo continua dialuna, Minister Presidente a indica.