Den Festival di Buki pa Mucha 2019 e tema ‘Medio di transporte’ ta haya atencion. Cu e lema ‘ Ban lesa, biaha y gosa’ biblioteca t a invita mucha pa biaha den buki y experencia aventura unico. Lesando un buki por descubri espacio sinta den un raket, nabega riba un barco di crucero, conoce un pais pa medio di un ‘roadtrip’, core riba tractor y subi lama den un catamaran. Un biahe ta enrikece bo bida y lesando un buki bo por biaha bay tur parti di mundo, E aña aki 65 scol na Aruba a entrega un peticion na biblioteca pa nan haya bishita di un autor of ilustrador cu ta haci un presentacion den klas. Di e 65 scol, 39 ta scol basico, 21 ta scol primario y 4 scol di enseñansa special. E comision di Festival di Buki pa Mucha ta hopi contento cu e aporte y interes pa e festival. E fiesta di apertura ta na Cas di Cultura dia 1 di november y e muchanan di scol Pius X ta trahando duro riba un bunita presentacion. E autornan di buki pa mucha ta yegando biblioteca caba pa e festival grandi. Asina Aladin a yega riba su tapijt. El a para su tapijt riba dak di biblioteca na Playa. Richard Dabian, c ontador di storia, a contribui e aña aki atrobe cu un storia titula ‘E faro di multicolo’. E storia a keda ilustra pa Gewout Esselink. Durante e festival Richard ta conta mucha e storia cu el a skirbi, den su disfraz special. Algun aña pasa Richard a haci un cambio di carera y a dicidi di bay traha den Dept. Hubenil di biblioteca. Aki Richard ta coordina actividad pa mucha. Richard gusta canto, baile y teatro y fe ​chikito caba el a namora cu e mundo di show y farandula. E ta bay radio pa conta storia y e ta subi stage pa stimula mucha pa lesa y scucha storia.