MACUARIMA, ARUBA: E virus conoci como COVID19, esta e corona virus, a percura pa cambia nos costumber y manera di biba nos bida di forma repentino. Mundo henter a haya su mes obliga na adapta e sistema normal di biba. For di linea di Cuerpo Policial, e alto mando kende tin un stul den grupo di expertonan, ta wordo respalda pa un asina yama SGBO, cual ta para pa Staf Grootschalig en Bijzonder Optreden.
Durante e prome dianan cu e ley a bin na vigor manera (Toque de Queda), miembronan di Cuerpo Policial a haya nan mes involucra den varios disputa innecesario. Nos kier a enfatisa cu diferente incidentenan cu a tuma lugar ta uno preocupante.
“HUNTO NOS T’E SOLUCION”, ta e nomber den e proyecto. Hunto como pais nos lo tin cu pasa e momentonan dificil pa asina hunto nos por sali for di dje. Algun bario lo haya sorpresa di bo Amigo Polis. E meta principal ta pa nos por conecta hunto bek. Menos problema, mas comprension, menos rabia pero mas union. Hunto nos por surpasa e momentonan mas dificil cu nos y mundialmente ta pasando den cu ta di e virus COVID-19. E projecto aki no ta di Cuerpo Policial so. Mas bien e ta un colaboracion conhunto cu ta wordo ehecuta pa KPA, pero cu ta wordo carga completamente door di e Operationeel Team bou direccion di sr. Hermans di Bureau Rampenbestrijding. Tambe nos a ricibi ayudo voluntario. Nos ta desea di cuminsa na gradeci den nomber di Bureau Rampenbestrijding, tanto Rotary Club of Aruba y tambe Fast Delivery, pa nan colaboracion exepcional. Na momento cu a splica nan kico y con e projecto aki lo bay ta, ambos a bay di acuerdo pa duna un man sin pensa dos biaha, pasobra nan tambe ta di opinion cu, HUNTO NOS T’E SOLUCION !
