Apesar cu a urgi un y tur pa paga online, toch un grupo grandi di cliente a presenta dialuna mainta na oficina di N.V. ELMAR na Oranjestad y San Nicolas pa cumpli cu nan obligacion di pago di coriente.
E situacion aki a crea rij basta largo pafor di oficina, particularmente entre 8-10 am cu ta e orario unda N.V. ELMAR a ofrece servicio di caha exclusivamente na clientenan 60+. Apesar cu N.V. ELMAR a programa e orario aki specialmente pa esnan 60+, y a premira cu lo bira druk, a tuma tur medida di precaucion necesario pa atende e clientenanaki, aplicando varios medida necesario pa evita contagio.
N.V. ELMAR a percura pa e esnan para den rij a mantene distancia fisico di 2 meter, a percura pa tent, handsanitizer etc. A percura tambe pa extra security pa monitor y controla e situacion pafo y paden di e edificio. Tur cos a cana sin incidente y por informa cu tawatin en total 6 loket habri non-stop pa atende cliente y e duracion promedio di cada transaccion tawata 2 minuut y 30 seconde.
Den tur esaki ta bon pa remarca cu N.V. ELMAR ta fungi como punto di pago pa WEB ARUBA N.V. tambe y gran cantidad di cliente di WEB ARUBA N.V. ta opta pa paga nan cobransa di awa na oficina di N.V. ELMAR. Ademas e MFA y HBK, cu normalmente tambe ta fungi como punto di pago, tawata cera dialuna. Ta conoci tambe cu algun banco a limita nan servicio di pago di utilidad via cahera.
N.V. ELMAR ta gradici tur cliente cu a paga nan factura di coriente y ta recomenda esnan cu no a paga ainda pa preferiblemente hasi pago on-line. Si no tin on-linebanking, por fabor pidi un ser keri pa yuda cu esaki.
Pa esnan cu no a ricibi nan factura via POST ARUBA NV, nos ta recomenda pa subi nos website elmar.aw y registra riba e-connect.
