Diahuebs atardi a drenta informe di cu tin un turista cu problema den lama na Arashi, mesora a dirigi tanto polis como ambulans na e sitio. E situacion a cuminsa cu un persona cu “rubberboat” compañando durante e trip den catamaran a mira mannan ta zwaai den lama na un distancia basta leu for di costa y a sali bay mientras a bati alarma. Na yegada di e ambulans a bin compronde cu 2 dama hulandes tabata snorkel den lama y e biento fuerte cu e coriente di lama a hibanan basta leu. E un boto a trese un persona cu problema leu den lama y mester practica C.P.R. mesora na e beach a cuminsa practica C.P.R. mientras esun cu e boto a laga nan ta purba yuda e dama ela sali bay busca un otro persona cu tambe ta den lama esey segun un kite surfer den lama cu a mira e otro muher na un distancia separa for di esun prome y a lant’e trese tera tambe. Una bes cu ela yega na canto voluntarionan y mas polis cu ambulans tambe a yega y a yuda e dama aki tambe. Despues di a practica C.P.R. e di 2 dama a cuminsa reacciona y a transporte mesora pa hospital. Lamentablemente e prome dama no a logra ser salba y un poco mas laat Dr. Voskuil a constata morto di e dama hulandes di 53 aña, Na famia di e fayecido ta bay nos mas sincero palabranan di condolencia.

VERSION POLICIAL:

POLIS A BAY E EXTRA MILE PA RESCATA DOS VICTIMA CU PROBLEMA DEN LAMA

MACUARIMA, ARUBA: Diahuebs atardi despues di 6’or Central di Polis ta wordo notifica cu lo tin turistanan cu problema den lama na Arashi. Di biaha Ta despacha Unidad di Polis como tambe ambulance na e sitio di e sucedido.

Na yegada di e prome Unidad di Polis, e agente policial ta observa cu tin un grupo den lama ta hisando man y ta gritando pa yudansa. Sin duda agente policial a bay di biaha den accion y a drenta lama pa por bay brinda yudansa na e victima cu tabata tin mester di Polis.

Ta trata di un grupo di turista nacionalidad hulandes. A bay lama y tabata snorkel y na dado momento un di nan a bira malo y no ta reacciona. Ta trata di un señora hulandes. E agente encuestion ta cuminsa na trece e señora canto y na mitar caminda ta topa cu un rubberboot di un compania local y nan na nan turno ta yuda pone e victima den e boto hunto cu e Polis pa trece canto.

E agente a keda duna e victima e prome auxilio (CPR) te ora nan a yega tera pa e prome unidad di ambulance presenta y a sigi cu e re-animacion.

Un rato despues ta avisa Polis cu tin un otro persona den lama cu tambe tin problema den lama y tampoco no ta reacionando. E señora aki tambe lo ta hunto cu e famia di e victima cu a wordo hiba canto. Un biaha mas esnan riba e rubberboot ta duna un man y ta yuda na busca y trece e otro señora.

A pidi pa mas unidad di ambulance pa presenta y pa duna re-animacion pa e di dos victima. Despues di trabou duro ta bin logra haya polso y asina stabilsa e di dos victima y transporte cu maximo urgencia pa hospital.

Lamentamblemente no por a haci nada mas pa e prome victima. Dokter forensico a presenta na e sitio y ta constata morto di e señora di 53 aña naci na hulanda. Cuerpo Policial ta manda palabra di condolencia na famia di e fayecido.

Na e sitio tambe a presenta departamento di slachtofferhulp pa brinda guia y yudansa na famia di e fayecido como tambe e otro victima. Loke nos di Cuerpo Policial a haya como ultimo informe ta cu e señora ta den cuido intensivo.

Cuerpo policial ta gradici y ta orguyoso di e agente polis cu a sa di bay un extra mile pa por a yuda dos victima. Su curashi y balentia ta trese cune cu nos di Cuerpo Policial Aruba ta agradecido. Esaki ta un di e tareanan cu nos di KPA ta haci lo maximo esfuerso di guia nos agentenan pa brinda e mihor servicio tanto na nos comunidad pero tambe nos bishitantenan.

Masha danki pa bo esfuerso y nos ta sigur cu nos comunidad ta orguyoso di mira nos agentenan bay e extra mile den nan carera policial.