MACUARIMA, ARUBA: Recientemente altocomisario drs. Ramon Arnhem a yama tres colega di fam Meye, Stamper y Dorothal pa ricibi nan certificado yama “oorkonde” pa nan maximo esfuerso y valentia pero tambe cu a drenta den accion mesora cu firmeza y sin duda.
Tabata den luna di december cu a sosode un incidente na unda un mucha homber a haya problema den lama na Manglo Halto. Aki a despacha e unidad di San Nicolas como esun di Trafico. Prome yega na e sitio tabata e coleganan menciona. Mirando e situacion di emergencia mesora e tres coleganan aki a bay den accion y cuminsa cu reanimacion di e mucha homber mientras tabata den espera di ambulance.
Trahando den equipo y bou coordinacion e polisnan aki a keda persisti cu nan reanimacion te final. Despues ambulance a tuma over y a bay cu e mucha homber hospital, pero lamentabelmente na hospital e la fayece.
Pa e tres polisnan aki tabata un momento dificil di wak un mucha homber luchando pa su bida pero cu nan accion rapido a purba di tur forma pa reanime sin pensa otro.
Pa es motibo altocomisario Arnhem ta mira e importancia di duna balor y honra e tres agente policialnan aki cu e titulo di mas halto di gratitud cu ta e “oorkonde”. Cu e documento aki ta pone un balor extra den nan carera policial.
Arnhem ta gradici e tres coleganan aki pa nan accion di bay e extra mile di brinda yudansa na hoben mientras ambulance no a yega ainda y a purba di tur forma pa duna e hoben un chens mas den bida. Ta di aplaudi e tres polisnan aki cu a haci nan maximo esfuerso den un caso di emergencia.
