Ultimo tempo tin hopi interes pa cu esnan den necesidad pa bishita dokter of hasi controlnan medico, y esaki mirando e gran cantidad di hendenan riba lista di espera ta bira dificil pa por ricibi un cita medico pa un control.

 

Diasabra ultimo Aruba Lions Club un di e clubnan di servicio mas bieu riba nos isla un biaha mas a presenta un bunita proyecto pa asina cumpli cu nan meta di yuda comunidad.

E biaha aki a organisa manera custumber e famoso “Healt Fair” pero e biaha aki esaki a tuma lugar den e districto di San Nicolas na St. Augustinus College.

For di oranan trempan di mainta e preparacionnan a cuminsa pa e miembronan di Aruba Lions Club pa asina cuminsa ricibi e promer bishitantenan cu for di 8or di mainta por a cuminsa registra y mientras ta warda turno nan por a disfruta di algun cos di come saludabel y fruta, hunto cu un thee, coffee of juice.

E actividad a dura te cu 12or di merdia caminda un gran cantidad di ciudadanonan a wordo yuda.

Den e dia di control di salud aki por a haci e controlnan di entre otro: wowo, oido, djente, control di pecho y esun mas bishita e seccion di control di sanger caminda ta tuma midi di haltura, peso, check sanger pa cholesterol y diabetes y despues ta ricibi un conseho di dokternan presente.

 

Hopi comentario positivo di e bishitantenan cu a keda masha agradeci pa e opurtunidad cu nan a ricibi y hopi a pidi pa por ripiti esaki den futuro.

Aruba Lions Club kier a gradici sigur tur cu a yuda den esaki cu un cantidad di studiantenan y dokternan pa hasi e evento aki posibel.

Tambe ta gradici St. Augustinus College cu a pone e school disponibel, y tur miembronan di Aruba Lions Club, LEO Club y otro voluntario cu a duna un man den e proyecto aki.