Noord, Aruba – 30 di December, 2024 – Den un demostracion poderoso di trabou di team y responsabilidad ambiental, Lions Club International Puerto Rico y Aruba One Happy Island Lions Club a uni forsa cu Ban Lanta y Planta (tambe conoci como Trees for Aruba) pa un evento significativo di plantamento di mata riba diamars, 17 di December, na The Bucuti Tara – GMC Nature Preserve. Huntu, nan a planta 20 palo nativo, manera Divi Divi, Palo di Boonchi, Sea Grape Tree, y Cawara Blanco, trahando pa un vision comparti di revitalisacion di paisahenan natural di Aruba y asina asegura un futuro mas berde pa e isla.
Un Regalo pa Crece un Futuro Mas Berde pa Aruba
Lions Club International Puerto Rico a hasi un donacion generosamente di 1,000 AFL pa sostene e iniciativanan di reforestacion di Ban Lanta y Planta. Ademas di e donacion, e 63 representante di Puerto Rico a participa activamente den e evento di plantamento di mata. Hunto cu miembronan di Aruba Lions Club, nan a uni cu Co-fundador y Presidente di Ban Lanta y Planta, Anita Aerts, y su voluntarionan dedica, pa garantisa e exito di e evento pa medio di trabou di team y compromiso comparti.
E plantamento di mata a tuma lugar na The Bucuti Tara – GMC Nature Preserve, un santuario di 32 hectar regala na Aruba den 2022 pa Ewald Biemans, Bucuti & Tara Beach Resort, y Greta Marie Case. E preserva ta wordo reforesta den colaboracion cu Ban Lanta y Planta, cu un vision pa reforesta e area y crea eco sistemanan prospero cu lo crea mas biodiversidad mientras ta absorba carbon, beneficiando e futuro generacionnan di Aruba.
Colaboracion di Comunidad den Accion
E evento a resalta e importancia di colaboracion di comunidad pa preserva e herencia natural di Aruba. Participantenan a disfruta di pasabocanan local di Aruba y t-shirtnan commemorativo cortesia di Aruba One Happy Island Lions Club, creando un ambiente festivo y bonbini.
“E colaboracion aki cu Lions Club ta un testimonio di con esfuersonan colectivo por logra un impacto significativo,” Anita Aerts a bisa. “Nos ta sumamente agradecido pa nan donacion y nan envolvimento activo pa yuda trece nos vision di un Aruba mas berde mas cerca di realidad.”
Boluntarionan di Ban Lanta y Planta a hunga un rol esencial den e evento, brindando experticio riba especienan di mata nativo di e isla y demonstrando tecnicanan di plantamento adapta na e clima unico di Aruba
Un Mision Creciente
Ban Lanta y Planta ta keda firme na su mision pa reforesta Aruba,conscientisa riba conservacion y promove proteccion di mata. E organisacion ta transforma areanan degrada activamente den ecosistemanan prospero door di involucra e comunidad y fomenta colaboracionnan.
Pa siña mas tocante Ban Lanta y Planta y nan iniciativanan di reforestacion, of pa haña informacion di con bo por yuda, bishita banlantayplanta.com of treesforaruba.com.
Tocante Ban Lanta y Planta
Ban Lanta y Planta ta un fundacion sin fin di lucro basa riba voluntarionan, dedica na reforesta Aruba pa sostene ecosistemanan sostenibel pa hende, animalnan y mata. E organisacion ta traha pa enrikece biodiversidad, absorba emisionnan di carbon y rehabilita e flora y fauna degrada di e isla. Pa medio di plantamento di mata, educacion y alcanse comunitario, Ban Lanta y Planta ta conscientisa tocante e importancia di conservacion y ta promove proteccion di e medio ambiente natural di Aruba. Siña mas tokante nan mision y iniciativanan na treesforaruba.com.
Tocante Aruba One Happy Island Lions Club
Aruba One Happy Island Lions Club, establece na 1947, ta parti di Lions Clubs International, e organisacion di servicio mas grandi di mundo. Dedica na hasi un diferencia den e comunidad local, Aruba One Happy Island Lions Club ta enfoca riba iniciativanan humanitario manera sostene educacion, salud, y sostenibilidad ambiental. Cu un compromiso na servicio y colaboracion, e club ta traha pa mehora bida di individuanan y fortalece comunidadnan rond Aruba. Siña mas tokante nan esfuersonan na arubalionsclub.org
Tocante Bucuti – GMC Nature Preserve
The Bucuti – GMC Nature Preserve ta un santuario ecologico di 32 hectar localisa den e curason di Noord, Aruba. Establese pa medio di un donacion generoso di Ewald Biemans, Doño/CEO di Bucuti & Tara Beach Resort, y Greta Marie Case, e preserva ta dedica na conservacion y restauracion di e ecosistemanan nativo di Aruba. E preserva ta wordo reforesta den colaboracion cu Ban Lanta y Planta, cu plan pa planta matanan indigena pa amplia biodiversidad, sostene fauna local y combati cambio climatico door di absorba emisionnan di carbon. Como un refugio pa naturalesa y educacion, e preserva tin como meta pa promove conscientisacion ambiental mientras ta crea habitat sostenibel pa e futuro generacionnan . Siña mas tocante e proyecto aki na bucuti.com.
