ORANJESTAD – Lider di partido Movimiento Electoral di Pueblo (MEP) Evelyn Wever-Croes ta gradici tur e 17572 sostenedornan, cu a deposita nan confiansa den partido MEP, durante urna electoral diabierna ultimo.Tambe el a expresa cu apesar cu tur otro partido tabata contra MEP, cu cierto medio di comunicacion a demonisa e gobierno tur dia, y cu tabata tin varios contra tempo, MEP a logra mantene 17572 voto. Y pa esaki lider di partido ta gradici tur esnan cu a confirma cu nan voto di confiansa, e lidersago di MEP den gobierno durante e ultimo 7 añanan.
Mirando resultadonan di añanan anterior por tuma nota cu na momento cu un partido goberna dos biaha consecutivo, e partido den e siguiente eleccion ta wordo castiga door di pueblo. Partido AVP mes na 2017 despues di dos gobernacion a bay atras cu 9718 voto, cu ta mas di 30%. Pa loke ta partido MEP, e eleccion aki a bai atras cu apenas 3128 voto cu ta 11%, manteniendo asina e nucleo di 8 asiento.
Lider di partido, den nomber di partido MEP, ta felicita partido FUTURO y partido PPA cu nan asientonan den parlamento, y tambe partido AVP cu a bira e partido mas grandi pa un diferencia di 302 voto.
“Mi a manda un pabien pa tur tres partido caba diasabra ultimo. FUTURO y PPA mi a felicitanan prome cu e resultado final a sali paso tabata obvio cu nan lo a haya e asientonan den parlamento, y partido AVP mi a felicita despues cu e resultado final a sali.
Awor ta bay drenta e fase di formacion, y mi kier pidi comunidad di Aruba pa ban duna espacio pa e procesonan di formacion cana nan caminda. Nos di partido MEP no ta e prome yama pa forma un gobierno, pero nos ta dispuesto si pa forma parti di un siguiente gobierno. E procedura apenas ta cuminsando, na unda Gobernador lo reuni cu diferente instancia y partidonan. Partido MEP lo tin un reunion diamars dia 9 di December pa 10:30 di mainta. Unabes cu gobernador reuni cu tur partido el lo apunta un informador cu lo sigui papia cu e partidonan, y despues lo apunta un formador pa finalisa e formacion.
Pa loke ta trata partido MEP mes, mi ta hopi orguyoso paso mi sa cu nos a traha hopi duro y nos a logra cosnan grandi pa pais Aruba. Tambe mi ta realisa cu pa mundo henter e recuperacion cu Aruba a mira bou di Gabinete Wever-Croes I y II tabata uno impresionante pero pa Aruba mes, e no lo tabata suficiente.
A mi mes ta satisfecho paso mi sa cu ma traha hopi duro, y mi sa cu mi ta laga Aruba hopi mas miho cu ora mi a haya e gobernacion na 2017, cual semper tabata mi meta. Un biaha mas danki y pabien na nos sostenedornan pa yuda nos mantene nos 8 asiento” Lider di partido a expresa.
