Oranjestad, 3 di December, 2024 – Aruba ta na caminda pa Eleccion, diabierna 6 di December
2024 y ta crucial pa informa e comunidad e importancia pa eherce nan derecho di voto na e
manera correcto door di vota segun Articulo 61 di e Ordenansa Electoral.
Conforme Articulo 61 di Ordenansa Electoral un voto ta VALIDO si:
● E stembiljet tin 1 ronchi yena na cora
● Pero e siguiente agregacionan tambe ta wordo considera valido
○ punt, strepi, krabbel, vink, cruz of vlek di e potlood cora den e ronchi
Conforme Articulo 76 di Ordenansa Electoral un voto ta INVALIDO si:
● Stembiljet no ta oficial: cualkier stembiljet cu no ta parti di e material oficial (p.e.
Specimen etc.)
● Stembiljet blanco: stembiljet cu niun ronchi a wordo yena cora
● Mas cu un ronchi: stembiljet cu tin mas cu 1 ronchi cu a wordo yena cora
● Uso di otro material: stembiljet cu e ronchi no a wordo yena cu e potlood cora (p.e. pen
blauw)
● Indicacion Personal: stembiljet cu cualkier remarke of indicacion di e votado
● Firma oficial: stembiljet cu no tin e firma oficial di e presidente di e Conseho Electoral
Si un votado ripara cu ela haci un fout mientras e ta votando, e mester avisa e Presidente di e
urna di e situacion y e votado lo ricibi e oportunidad pa vota di nobo. Esaki por sosode
solamente 1 biaha pa cada votado.
Nota Importante
Conforme Articulo 77 di e Ordenansa Electoral e miembronan di urna ta dicidi riba e validez
di un voto;
● Encaso cu tin empate pa un decision, e Presidente di e urna ta dicidi e validez di e voto
● Votadonan presente na e stem local por haci obhecion contra e decision di e
miembronan di urna y e Presidente di Urna lo haci anotacion di e obhecion den un
proces-verbaal.
Nos ta insisti pa votado sigui e reglanan di voto pa garantisa un eleccion husto y transparente,
Bo voto ta importante!
Pa mas informacion, bishita e website oficial di Conseho Electoral Aruba na er.aw y sigui nan
na Facebook y Instagram @consehoelectoralaruba. E plataforma nan lo sirbi como un recurso
importante pa votadonan, candidatonan, partidonan politico y publico general, pa keda al dia cu
anuncionan, fecha nan y guia relevante pa e eleccion di Aruba
