Den oranan di diamars anochi bario di Kudawecha a keda sin coriente y mesora habitantenan a bati alarma na ELMAR. Inicialmente a pensa cu por tabata trata di un accidente. Sinembargo a resulta cu un pal’i luz a sucumbi pa e peso y a cay den otro. Segun e habitantenan, ta trata di un palo basta bieu. Pero combersando cu un di e habitantenan, sr. Nelson, el a splica cu e palo aki a yega di cay caba y a wordo cambia. Pues e ta uno relativamente nobo.
Segun el a splica, den oranan di atardi el a yega cas y a mira cu a palo tabata manera di banda. Ainda el a bisa su colega “e transformer ta poniendo hopi presion riba e palo. E por cay cualkier momento.” Y esey a sosode tambe.
El a conta cu e tabata sinta ta wak television ora cu di repente el a tende un zonido masha duro y a core bay wak kico ta pasando. El a mira e palo tira na suela y henter e bario den scuridad.
E ciudadano a comenta cu e palo di luz aki a yega di wordo cambia caba ora cu el a kibra, pero e ta kere cu e sistema di transformer poni riba dje tabata demasiado.
E caida a afecta tres bario, esta Kudawecha, Calabas y Ser’i Janchi, y segun por a compronde, nan a keda entre 6 pa 7 ora sin coriente. Te ainda no tin ningun daño raporta na cas di famia den e barionan menciona.
