ORANJESTAD – Siman pasa Directie Natuur en Mileu (DNM) a haci un evento di “team building’ na tereno di Ban Lanta y Planta. Na unda cu 10 colega a bini hunto na e tereno di plantacion na Noord di e organisacion menciona. Conhuntamente cu e director di DNM, e team di DNM a planta 5 mata: Mahawa, Fofoti, Pal’i bonchi, Pal’i brazil y Pal’i siya blanco. Tur ta matanan local y protegi.
Manera por sigui ariba e plataforma social di DNM, nos a publica tur e sortonan di flora protegi y awo ta sigui cu e fauna protegi.
E team a haya informacion completo di tur e matanan y un guia di e tereno con e ta maneha y conserva. E mainta aki tambe e team a prepara e tera, e suelo, carga awa pa muha e area cu ta bay planta e mata, y pone ‘mulch’ pa yuda cu e humedad no ta evapora mucho lihe.
Manera cu director a pone riba e plataforma di DNM: “A planta awe, pa mañan, pa mañan nos tin fruta y sombra, pa nos tin naturalesa. Pa awe nos team a crece mas”.
E organisacion ta aprecia e tipo di encuentronan aki y asina duna un aporte na e meta di “Ban Lanta y Planta”. Un proyecto cu a cuminsa hopi aña pasa manera un soño bou di hendenan cu ta stima naturalesa na Aruba. Nos a haya bishita tambe di un pareha prikichi, cu a pasa grita nos “bon trabou”.
