Diadomingo madruga a drenta informe di un accidente cu hende herida na Shiribana dilanti Tao Bao. Mesora a dirigi tanto polis como ambulans na e sitio. Na yegada di e patruya a bin compronde cu un auto lo a pasa dal un dama riba un electric step y sigui core bay. Na yegada di e ambulans a atende e dama cu a resulta seriamente herida pero cu no tabata duna senal di bida. Mesora a avisa tur autoridadnan competente pa bini na e sitio. Tin algun testigo cu a mira locual a sosode y tambe e camaranan di seguridad unda por mira claramente ta cual auto a dal e dama cu resultado fatal pa e dama.

 

Version policial:

—-CUERPO POLICIAL TA INFORMA —-

DI 9 MORTO DI TRAFICO

Diadomingo madruga pa 01:10 Central di Polis ta wordo notifico di un accidente na altura di Shiribana Bar & Restaurant na Paradera. E prome informacion ta cu un auto lo a alcansa un señora riba un e-bike (step).
Central ta despacha un patruya cu maximo urgencia. Na yegado di e patruya ta bin topa cu un señora ariba caminda y no ta duna señal di bida. Patruya ta pidi ambulance cu maximo urgencia. Na yegada di ambulance e personal a haci nan maximo esfuerso pero lamemtablemente no por a haci nada mas pa e señora.

Docter Valkuil cu ta dr forensico a presenta na e sitio y a constata morto di e señora Julieth Patricia Patiño Castro naci 15 november 1988 (35 aña) na Colombia.
Departamento di trafico a presenta pa haci nan investigacion .

Ta haci un apelacion na e chauffeur di e auto cu a alcansa e señora pa entrega su mes na un di e warda di polis of tuna contacto cu central di polis na nr 100.

Departamento di Slachtofferhulp a presenta na e sitio pa asina duna sosten na famia di e fayecido.

Cuerpo Policial ta manda palabra di condolencia na famia di e fayecido.