E hunta di Aruba Hotel & Tourism Association (AHATA) a reuni cu directiva di Utilities Aruba N.V. pa continua dialogo regular y pa ricibi informacion tocante progreso den plan di mehoracion pa e planta di RWZI na Bubali.  AHATA tin hopi aña ta boga pa yega na un solucion pa e planta cu actualmente no tin suficiente capacidad pa e volumen di awa sushi cu e ta ricibi. Algun luna pasa un compania estatal nobo, AWSS N.V., cu ta cai bao di Utilities Aruba N.V., a tuma e responsabilidad pa henter Aruba su proceso di awa sushi. Anteriormente e responsabilidad tabata cai bao DOW.

 

E reto di capacidad, pa motibo di falta di inversion den e planta den ultimo decadanan, ta crea un riesgo pa Aruba su laman y playa na Eagle Beach y Palm Beach. AHATA ta aprecia cu Utilities Aruba (via AWSS) ta implementando solucion temporario y solucion permanente na e plantanan y a pidi pa clarificacion riba e progreso di e proyectonan. Cu high season di turismo yegando y 2 hotel nobo habriendo na Eagle y Palm Beach, e urgencia pa yega na un solucion pa por procesa e volumen di awa ta crece.

 

Durante e encuentro, Utilities Aruba N.V. a duna un splicacion detaya di e proyecto y fechanan di instalacion. AHATA lo keda activamente den dialogo cu Utilities Aruba N.V. y otro partidonan involucra cu servicionan esencial na Aruba, pa asina sigui contribui na bienestar sostenibel pa Aruba su industria principal.