Calabas/Kudawecha – E rij di boluntario pa bati team Snor ta creciendo cu cada bataya di domino den e palacio di domino aya na Kudawecha, esta e tan fama Domino Square Garden. Diasabra ultimo 12 di october, Sheriff “Snor” Perez a bolbe pone ordo den Domino City ora cu den un bon bataya el a one un strepi mas riba cabo di su pistol! E conocido ekipo di Biba Lekker, bou guia di Don Trimon, a yega yen di animo y ilusion pa caba cu e reinado di Snor, pero den un forma indudabel Snor a demostra cu nan ta “the team to beat”! 

E prome rondo a bay manera relampago! Snor ta bay 4-1 dilanti, y den “no time” ata Team Snor ta dilanti cu 7-1. Smile di horea pa horea, pero den corto tempo e smile a cuminsa bira manera di cabay cu a come wanglo. Ata pocopoco Biba Lekker su motor a cuminsa start y paso a paso nan a cuminsa cera e “gap” entre nan cu Snor. Cos ta na 8-6 na fabor di Snor ora cu porfin e motor di Team Snor a cuminsa start atrobe y punto a drenta atrobe. Halftime ta bay aden cu score di 11-8 pa Snor. E pasapalonan a cuminsa lora di biaha y manera warawara na yuna un y tur a baha cu gara “géstrèch” pa logra un snack! Tur plan di dieet a ser benta foi boto y den no time scalchi ta bashi. 

Di dos tempo ta cuminsa y ta bira bisto cu Biba Lekker a tene un tremendo “pep talk” den pauze. Score ta preta preta na 15-14 pa Snor, cu rosea di Biba Lekker ey mes den lomba. Management team di Snor ta “grijp in” di biaha y varios divorcio ta cay den team pa drecha cuenta! Snor su ekipo ta stabilisa y por ultimo ata Han cu Lee ta lanta para y grita “21!” pa Team Snor. Team Biba Lekker a tranca na 18 y c’un bon bataya e ekipo di Snor ta marca otro victoria tras di su nomber cu score di 21-18. Shonnan, fin di aña ya a cuminsa laga su sombra cay caba y te ainda Snor ta invicto! Caya ta papia cu aki poco tempo tur contrincante lo cera cabes pa lanta un “All Star Team” pa wak si ainda por laga Snor trompica pa 2024! Keda pendiente!