ORANJESTAD – Recientemente Garage Centraal Aruba tabatin e privilegio di haci entrega di 10 Leapmotor T03 Electric pa uso di e profesionalnan di Aruba su hospital.

E cuerpo medico y profesional awor ta conta cu e apoyo di e tremendo autonan Leapmotor aki. E autonan aki ta importante mirando cu nan ta aporta den forma di transporte pa loke ta trabounan cu ta esencial pa cuido medico. Y awor cu e autonan electrico aki esaki lo ser haci cu menos impacto negativo directo na nos medio ambiente.

E Leapmotor T03 ta un auto compacto, pero cu toch ta ofrece un cantidad di opcionnan cual lo por ser mira den autonan den categorianan mas luhoso, manera un 8” Touch Screen Media y Control system, Sunroof, Start Button, Sensor pa Presion di Tire y mas. Y su motor electrico ta ofrece un potencia halto, locual ta un beneficio cu por ser mira entre autonan electrico.

Leapmotor como marca a cuminsa como un compania encarga cu produccion di componentenan pa otro marcanan di auto, y despues nan a dicidi di aplica nan experticio na e fabricacion di nan mes un modelonan di auto. E ingenieria di Leapmotor ta di calidad asina halto cu e compania a haya un inversion di 1,5 biyon Euro for di Stellantis, e mes un corporacion cual tin marcanan manera Dodge, Jeep, Fiat entre otro. Stellantis cu e acuerdo aki lo fabrica autonan di Leapmotor pa exportacion rond mundo.

Awor e grupo di autonan T03 aki ta ofrece un apoyo valioso na e trabou di nos Hospital, y ta un placer pa Garage Centraal pa por ofrece autonan asina na nos comunidad.