MACUARIMA, ARUBA: Recientemente a tuma lugar un ehercisio pisa na unda cu e studiantenan nobo policial klas N4-2024 1 a participa na dje. Ta trata aki di un prueba di stress cu nan a eherce durante tres dia largo cu ehercisionan pisa bou guia di docentenan di Scol di Polis E.J. Watty Vos.

Na final di e prueba mester “Speed mars” for di Mareniers Kazerne Savaneta direccion Scol di Polis E.J. Watty Vos pa asina completa nan tres dia di prueba di stress. Na nan yegada bou di zwaailicht y sirena na a topa cu agentenan policial di diferente departamento manera polis uniforma di San Nicolas, trafico, klas N4-2023 docentenan, Hefe di Scol di Polis E.J. Watty Vos Sra. Arrindell como tambe altocomisario di Polis drs. Ramon Arnhem cu a yama nan Bon Bini.

Altocomisario Ramon Arnhem a yamanan bon bini como tambe dunanan mensahe di apoyo y sosten pa nan inicio di estudio policial. Un di e puntonan importante cu a wordo infoca ta Union, yuda otro y comunica cu otro.

Desde awo nan estudio policial ta inicia na unda cu nan lo cera conoci cu diferente materia manera buki di codigo penal y procedura penal, diferente ehercisio manera landamento etc..

Nos ta desea e klas nobo aki N4 2024-1 hopi exito y nos lo miranan pronto riba caminda.