Diamars mainta oficialnan di Landsrecherche cu varios otro instancianan oficial a haci un entrada oficial na un adres na Bubali. (Mas detaye di e accion aki no ta conosi ainda pero manera nos ricibi e informe for di autoridad nos lo suministra esaki)
Informacion emiti pa Ministerio Publico:
Awe mainta 8 di oktober 2024 a detene e minister di Labor, Energia y Integracion Glenbert Croes. Despues a tuma lugar un listramento (“doorzoeking”) den su cas.
E detencion ta den cuadro di e investigacion Portulaca. Esaki ta un investigacion cu ta andando algun tempo caba di Landsrecherche bao di guia di Ministerio Publico.
E investigacion aki ta entre otro dirigi riba e sospecho di delitonan encuanto dunamento di permisonan di estadia/trabou entre 2020 te cu awor.
Anteriormente, dia 4 di juni 2024 den e mesun investigacion Portulaca, detencionan tambe a tuma lugar caba. E tempo ey tambe listramento den diferente cas y edificionan commercial a sosode y confiscacion di obhetonan a tuma lugar.
Di e investigacion hasi despues na e obhetonan confisca, e sospecha contra e Minister a surgi.
Ministerio Publico a aplica riba e sospechoso restriccionnan den interes di e investigacion. Esaki kier meen cu e sospechoso por tin contacto solamente cu su abogado y no cu otro hende. Entre otro pa e motibo aki Ministerio Publico ta cauteloso cu dunamento di mas informacion encuanto e contenido di e caso aki.
Sí mi kier comparti lo siguiente. Esaki, encuanto e momento cu e detencion di e sospechoso a tuma lugar.
Sucesonan politico nunca ta influencia curso di un investigacion penal.
Aworaki tampoko.
Ministerio Publico y Landsrecherche ta mantene den investigacionan penal na nan propio planificacion/planning. Loke descubri durante e investigacion frequentemente ta determina e momento di detencion di un sospechoso y e ehecucion di listramentonan (“doorzoekingen”).
Por lo tanto, cu e detencion ta awor, awe, tin di haber cu e momento den cual e sospecha contra e minister a surgi, e planning/planificacion di Landsrecherche, juez-comisario y Ministerio Publico. Y tur esaki no ta diferente fe loke ta usual den otro investigacion.
Cu gobierno a cai dia 9 di september y cu despues eleccion a wordo yama, por lo tanto no a influencia e planning/planificacion aki.
E investigacion penal ta sigui. No ta exclui cu mas detencion lo por tuma lugar den e caso aki. Den interes di e investigacion cu ainda ta andando, Ministerio Publico na e momento aki no ta duna mas informacion.
