Recientemente e Centro Operativo Maritimo di Guarda Costa di Caribe a ricibi informe di un boto den peliger riba lama. Un total di 3 tripulante local tabata den un barco dilanti Bullenbaai (Curacao), cual a haya problema den e motor, loke a pone nan drief bay na costa.

Inmediatamente a solicita asistencia di e helicopter pa evalua e situacion di e boto. Un unidad Metal Shark tambe a ser dirigi pa Bullenbaai pa yuda e boto den peliger. Ora cu e miembronan di e Metal Shark a yega, nan a descubri cu e boto ya a yega tera. E tres personanan a bordo tabata sano y a salvo na tera. E Metal Shark a logra libera e embarcacion y a townan te na Boca Sami, unda tambe a hiba e tres personanan. Na nan yegada na Boca Sami, a pidi ayudo di bombero pa saca e awa for di e botocu un pomp special.