Aruba Lions Club conoci pa hopi aña cu su rifa di cas pa asina por recauda fondo pa yuda comunidad, awendia ta evaluando riba otro maneranan y opcionnan pa por reemplasa esaki.

Mientrastanto e organisacion ta sigui traha riba su fondonan y den e caso aki ta enfoca riba otro actividadnan cu por yuda nan fondo pa sigui cu e bunita trabounan den comunidad.

Pa esaki Aruba Lions Club ta organisando diasabra 28 di September venidero un “Lions Car Rally – Scavenger hunt” unda hopi hende por diberti cune y alabes ta yuda cu un contribucion cu ta bai bek den comunidad.

Pa cada persona cu ta interesa di participa cu e “Lions Car Rally” por inscribi riba e siguiente link aki https://forms.gle/XDhoL3oGVoNy9CABA.

Por tin maximo 5 persona den auto y e Car Rally lo cuminsa na club di Lions situa na Engelandstraat 11 na Eagle pa 7or di anochi y lo core den e cayanan di Oranjestad y tambe Noord pa despues finalisa bek na e punto di salida.

Den nos mundo moderno, awendia cu tur cos ta digital, pa cu e Car Rally aki tambe tur informacionnan lo bay via whatsapp unda tur participante lo ricibi nan instruccionnan y tareanan cu mester cumpli cune.

Sigur lo bay tin varios premionan interesante manera entre otro di 500 florin cash y mucho mas pa e dia aki.

Pueblo henter ta keda invita pa forma parti di e Car Rally aki y bin gosa hunto cu famia, amigonan, coleganan, pa haci e anochi aki uno dibertido.

Por inscribi adelanta via e link akiriba of tambe via e link cu ta aparese ariba e pagina di facebook di Lions Club of Aruba, caminda por ricibi tur informacion di e diferente manera con pa haci e pago di inscripcion.

Ban gosa den un ambiente alegre e anochi aki y contribui cu Aruba Lions Club, nan ta warda boso diasabra 28 di September pa 7or di anochi na Engelandstraat 11.