Aruba Tourism Authority (A.T.A.) ta reafirma su compromiso pa crecemento y empoderamento di e Industria Cultural y Creativo di Aruba cu sosten na Conferencia CreActivo. Destacando e papel vital cu e sector ta hunga den nos identidad y den diversificacion di e oferta turistico.
Como e organisacion encarga cu e pilar principal di nos economia, A.T.A. ta reconoce cu ademas di turismo, e industria cultural y creativo ta uno crucial pa nos pais. “E Industria Cultural y Creativo ta esencial pa nos identidad nacional y ta brinda un oportunidad pa diversifica e destinacion, y e experiencia cu nos por ofrece, tanto na nos comunidad local como na nos bishitantenan,” Derchlien Dijkhoff, Senior Product Specialist di A.T.A. a duna di conoce. A.T.A. ta compromete pa sostene e industria a base di creacion di fundeshi solido, pa esaki por sigui crece, crea un impacto positivo pa e comunidad, y comparti e rikesa cultural di Aruba cu e bishitantenan.
A.T.A. ta enfatisa cu e colaboracion cu Go Cultura Foundation ta mucho mas cu solamente un aliansa. E ta un esfuerso strategico pa crece y fortifica e Industria Cultural y Creativo. Un aspecto cu A.T.A. a bin ta enfoca riba dje pa varios aña caba. Asina por bisa cu A.T.A. a bin ta traha hunto cu Aruba Art Fair, Celebracion Dia di Brazil, SMAC asina cargando nos Carnaval grandemente, Fundacion Museonan Arubano cu ta organisa e Bonbini Festival semanal, pero tambe por pensa con a traha cu artistanan local p acu emebeyecemento di trapi di Rodger’s cu arte mozaiek, y sigur por menciona hopi mas ehempel di esfuersonan. Tur ta evento- y proyectonan cu ta reconfirma e compromiso di e organisacion pa cu e industria aki. Tur ta evento/ proyecto cu ta enrikese e panorama cultural di Aruba, y ta duna un plataforma pa e artista local y su creatividad sobresali. E meta comun entre A.T.A. y Go Cultura Foundation ta pa formalisa y desaroya e sector Cultural y Creativo, pa asina sigui contribui na desaroyo sostenibel di Aruba.
A.T.A. ta dedica na empodera e sector cultural y creativo, pa medio di educacion y tambe creacion di un strategia integral basa riba data. E enfoke aki lo yuda guia e industria na un desaroyo sostenibel y lo asegura cu cada paso ta basa riba evidencia solido.
E conferencia di CreActivo ta brinda un oportunidad valioso pa tur artista, innovador, y lider den e industria por sigui desaroya nan talento y habilidadnan unico. Un invitacion ta keda na tur artista, creador, inovador y visionario pa asisti na CreActivo, unda nan lo comparti y conecta segun talento, creatividad, habilidad, perspectiva creativo. Bishita www.gocultura.org pa mas informacion di e conferencia cu lo tuma lugar dia 8 y 9 di oktober.
A.T.A. lo sigui ofrece sosten continuo y colaboracion na e industria, contribuyendo asina na un Aruba mas fuerte y vibrante.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organizacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta pone enfasis pa mehora y mantene esfuerzonan pa logra e balans entre cuater pilar: ‘Calidad di Bida di e Residente’, ‘Calidad di Experiencia di e Bishitante’, ‘Proteccion y Preservacion di Naturalesa & Medio Ambiente’, y ‘Contribucion Economico na nos isla’. Ta enfoca na atrae e bishitante cu lo inverti mas (calidad en bes di cantidad mirando cu capacidad di carga ta sigui ricibi atencion di parti di A.T.A.), lo aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion.
