Diasabra marduga a drenta informe di un accidente na e birada peligroso di Sabana Liber, mesora a dirigi un patruya na e sitio. Na yegada di e patruya a bin compronde cu aki ta trata di un accidente hit and run unda un Suzuki Swift color cora A-72572 biniendo for di Calabas, a perde control cu e tera cu tabatin riba caminda y a bal den den cura di cas Sabana Liber # 44-A. Den e cura tabatin dos auto staciona, un Suzuki y un KIA, di cual ambos a ricibi sla door di e impacto. E chauffeur di e auto a opta pa reverse y huy for di e sitio. Sinembargo, e doño di cas a lanta mesora door di e impacto y a yama Polis y duna number di e auto y e direccion cu el a tuma pa purba huy for di e accidente. E chauffeur no a logra yega mucho leu, pasobra un patruya atento a topa cune na altura di Wei Ming Supermarket. Eynan Polis a lag’e supla y e test a sali malo p’e, pues el a surpasa e nivel di alcohol permiti den bo rosea. Polis a detene e dama chauffeur y a bay warda di polis cun’e. Afortunadamente ningun hende a resulta herida.
