ORANJESTAD – Departamento di Impuesto ta anuncia cu otro aña lo otorga plach’i number nobo na e doñonan di vehiculo di motor. E plachinan nobo ta bay ta valido pa un periodo di 5 aña, esta pa e añanan 2025 te cu 2029. Na e momentonan aki e plachinan ta wordo fabrica den exterior y ta premira cu lo ricibi e plachinan durante luna di december 2024. E momento exacto ora cu lo bay cuminsa parti e plachinan aki lo wordo anuncia despues.

E colornan nobo
E plach’i number nobo lo consiti di e colornan blauw y blanco. Fondo blauw cu letter y cifra blanco. E tint di e color blauw no a yega di wordo uza den pasado. E ta un color cu e comunidad di Aruba sigur lo bay haya diferente y bunita. E colornan nobo ta carga aprobacion di Cuerpo Policial ora ta trata visibilidad y control di trafico den dia y
anochi.

Algun otro detaye importante
Aki ta sigui algun otro detaye di e plach’i number nobo:
– E color blauw ta un verf cu ta reflectivo pa garantisa un miho visibilidad anochi.
– E material di aluminium ta mas diki compara cu e produccion anterior y ta haci e plachinan mas fuerte y duradero.
– Riba e plachinan por wak e periodo di validez: 2025 – 2029.
– Di awor en adelante no ta otorga e plachinan chikito mas. Pues cada contribuyente automobilista lo ricibi unicamente e plachinan grandi. Departamento di Impuesto ta promove un ambiente sostenibel cu menos desperdicio posibel y mas eficiencia den su procesonan.

Tarifa di impuesto
Pa aña 2025 e tarifa di impuesto di vehiculo di motor a keda igual cu e añanan anterior.
Costo di e plachinan. E costo di e plachinan ta Afl. 14 pa e dos plachinan grandi. E costo di e plachi chikito pa brommer ta Afl. 10. Mester paga e suma aki ora cu paga e impuesto pa por ricibi e plachinan nobo.
Ehempel:
Suma di impuesto di mita aña: Afl. 150
Suma total di pago di prome mita di aña 2025: Afl. 164 (150 + 14).
Pa brommer, e suma di impuesto ta Afl. 150 pa aña. Pues mester paga total Afl. 160 (150+10).

E fecha final di pago ta 31 di januari 2025.
Seguro mester ta na ordo. Manera custumber, Departamento di Impuesto no ta otorga e plachinan di number si e seguro di e vehiculo di motor no ta na ordo. E seguro mester ta valido na momento cu ta otorga e plachinan na e contribuyente. Departamento di Impuesto ta haci un apelacion na tur automobilista pa cumpli cu nan seguro di vehiculo di motor
na tempo y no warda te januari 2025 pa por regla esaki. Departamento di Impuesto ta haci un apelacion na tur contribuyente pa percura pa no tin debe atrasa di impuesto di vehiculo di motor y cu e seguro ta valido pa evita inconveniencia despues ora di otorga e plachi di number 2025.

Gerencia di Departamento di Impuesto
11 di september 202